Түркістан қаласында асыл сөздің маржаны мен терең ойдың тұнығын әуезді әнмен жеткізетін терме өнерін өскелең ұрпаққа кеңінен насихаттау, сөйлеу мәдениетін қалыптастыру, ұлттық өнердің мәйегі болып табылатын дәстүрлі ән мен терме жанрын дамыту мақсатында ҚР халық әртісі, профессор Қажыбек Құдайбергенұлы Бекбосыновты еске алуға арналған облыстық «Бабалар рухы үн қатты» атты дәстүрлі әнші, термешілер байқауы өтті. Осы байқауда ауданымыздың намысын қорғаған Мұрат Нұрғиса ІІІ орынға ие болды.
Жүлдегер жерлесіміз байқауда халық әні «Бесқарагерді» және Қайыпназар Әйтпеновтің «Сөйле, тіл» атты термесін нақышына келтіріп орындады. Нұрғисаны байқауға дайындаған жетекшісі – аудандық мәдениет үйінің дәстүрлі ән және терме жанры бойынша әдіскері Бейсетаев Досжан.
Музыканттар отбасында тәрбиеленген Нұрғисаның әкесі қалалық саз мектебі директорының оқу ісі жөніндегі орынбасары Ерлан Керімбаев, анасы Салтанат – М.Әуезов атындағы жалпы білім беретін мектептің музыка пәні мұғалімі. Әпкесі Астанадағы «Шабыт» университетінің студенті, көптеген конкурстардың жүлдегері. Нұрғисаның өзі – қазіргі таңда Шымкенттегі музыка колледжінің 4-курс студенті.
Айта кетейік, Мұрат Нұрғиса аудандық байқауда 1-орынды иеленіп, облыстық байқауға жолдама алған болатын. Дәстүрлі ән мен терме жанрын дамытуға өз үлесін қосып жүрген жас өнерпазға келешекте де биік белестерді бағындыра беруіне тілектеспіз!
«Төлеби-ақпарат».
