Меніңше, Қазақстанның көк байрағын бүкіәлемдік спорт жарыстарында желбіретіп, әнұранымызды аспанымызда қалықтату үшін ең алдымен ауыл спортын дамыту керек деп ойлаймын. Мен 39 жылдан бері Түркістан облысы, Төлеби ауданы, Сұлтанрабат жалпы орта мектебінде балаларды дене тәрбиесіне баулып келемін. Сондай-ақ көршілес Қазығұрт ауданына қарасты №2 балалар мен жасөспірімдердің олимпиадалық резервтері мектебінде 2007 жылдан бері балалар мен жастарды спорттың пауэрлифтинг түріне баулып, жатықтырушылық жасаудамын. Оларды өз үйімнің жанынан ашылған шағын спорт кешенінде жаттықтырып жүрмін. Қол жеткен жетістіктеріміз аз емес. Шәкірттерім бүкіләлемдік жарыстарда топ жарып, әлем чемпиондары атануда. Біздің ауылдағы балалар мен жасөспіріпдер спорт мектебінен бүгінге дейін 5 әлем чемпионы шықты. Атап айтқанда: Алена Гладкова 2 дүркін, Рада Аюдирова 2 дүркін және Нигара Абдирова 2 дүркін әлем чемпионы атанса, Барно Жұмабаева 3 дүркін әлем чемпионы атанды.
Барноны біз мақтан тұтамыз. Себебі ол спорттың пауэрлифтинг түрінен Азия құрлығы мен бүкіл әлемнің рекордын жаңартып, осы спорт түрінен әлемдегі ең мықты 10 спортшының көшін бастап келеді. Бұл – бүкіл қазақстандықтар үшін мақтаныш деп ойлаймын. Ол «2024 жылғы Азияның ең үздік спортшысы» атағын жеңіп алды.
Бұл күндері біздің спорт мектебінде жоғарыда есімдері аталған әлем чемпиондарымен қатар 10 жас спортшыны спорттың осы түріне жаттықтырып жүрмін. Олар алғашқы жарыстарда жеңіс тұғырынан көріне бастады. Болашақта бәрі де үмітімді ақтап, әлемдік додаларда Қазақстанның көк байрағын аспанда желбіретіп, әнұранымызды шырқата беретіндігіне сенімдімін.
Бүгіндері ауыл мектебінде балаларды дене тәрбиесіне баулуда қыз балалар мен ер балаларды бірге спортқа баулитындықтан, мұғалімдердің сағат саны кеміп кетті. Осының өзі ұстаздардың шәкірттерін түрлі спорт түріне баулуға айтарлықтай кедергі келтіруде. Ашығын айтқанда, сағат санының кемуі, балаларды дене тәрбиесіне баулу кезінде уақытымыздың жетіспеушілігін анық білдіре бастады.
Т.ТАДЖИЕВ, жаттықтырушы.
Ленгір қаласы.
