«Қазақстан Республикасындағы жергiлiктi мемлекеттiк басқару және өзiн-өзi басқару туралы» Қазақстан Республикасы Заңының 21-бап, 2-тармақ, 2) тармақшасын басшылыққа ала отырып, бекітілген кестеге сәйкес депутаттардың өз округтері бойынша сайлаушыларымен кезекті кездесуі сейсенбі күні Киелітас ауылдық округінде өтті.
Сұлтанрабат жалпы білім беретін мектебінде өткен басқосуда №12 сайлау округінің депутаты Ерболат Жабаев, №13 сайлау округінің депутаты Дилмурат Омаров және №17 сайлау округінің депутаты Белес Рысбаев (суретте) сайлауалды бағдарламаларының орындалуы, тұрғындармен кездесулерде көтерілген түрлі мәселелердің шешілу барысы мен ұсыныс-тілектердің іске асырылуы және басқа да атқарылып жатқан жұмыстар туралы сайлаушыларды хабардар етті.
Сұрақ-жауап форматында жалғасқан кездесуде округ тұрғындары жайылым жерлерді қайтару, түнгі жарық, көпір, Сауран көшесіне суағар (лоток) орнату сынды және басқа да мәселелерді ортаға салды.
Мәслихат төрағасы Нұрлан Қойбағаров кездесуде қойылған сұрақтарға жауап беріп, айтылған өтініш-тілектердің барлығы заң аясында кезең-кезеңімен шешімін табатынын және әр сауал жеке бақылауында болатынын жеткізді.
«Төлеби-ақпарат».
