Өткен аптада биылғы оқу жылында республикалық, облыстық байқауларда топ жарған оқушылар «Тау самалы» шаңғы базасында бір күндік демалысқа барып қайтты. Олардың қатарында пән олимпиадаларында үздік нәтиже көрсеткендер мен спорт пен өнерде жүлде алған оқушылар болды.
– Саяхатқа шыққан адам әлемнің таңғажайып, тылсымға толы мекендерін өз көзімен көру бақытына ие болады. Алатау баурайындағы «Тау самалы» демалыс аймағына саяхаттап келіңіздер. Сапарларыңыз сәтті өтсін! – деп балаларға ақ жол тіледі арнайы шығарып салған аудан әкімі Еркеғали Әлімқұлов.
Ол – ұйытқы болып, «Тау самалы» демалыс аймағы басшысының қолдауымен өткен саяхатқа 40 бала барды. Олар табиғат аясында серуендеп, қырат басына аспалы жолмен шығып, атқа мінді, шаңғы теуіп, шанамен сырғанады. Ұстаздары оқушыларға туған жердің табиғаты жөнінде мағлұматтар берді. Мұндай игілікті жобалар жыл бойы жалғаспақ.
Таудың саф таза ауасымен тыныстап, биік шыңнан табиғаттың сұлулығын тамашалаған оқушылар ұйымдастырушыларға алғыстарын айтты. Талай сырға қанық, бойы тұнып тұрған тарих Алатау баурайын өз көздерімен көріп, ерекше сезіммен оралды.
«Төлеби-ақпарат».
