Аудан әкімі Еркеғали Әлімқұлов бекітілген кестеге сәйкес азаматтарды жеке қабылдап, өтініш-талаптарын тыңдады. Тұрғындар көтерген мәселелерді жауапты сала басшыларымен бірге зерделеп, оңтайлы шешу жолдарын қарастырды.
Жеке қабылдауға Көксәйек, Кемеқалған, Киелітас ауылдық округтері, Ленгір және Шымкент қалаларының азаматтары келді. Тұрғындар тұрғын үй, екі ауыл арасын жалғайтын жаяу жүргіншілерге арналған жол, ойын алаңшасын орнату, көшеге асфальт төсеу мәселелерін көтерді. Сондай-ақ, кітапхана құрылысы, түнгі жарық шамдарын қою, жер, электр жарығына қатысты өтініштер де қаралды. Екі қолға бір күрек таппай жүрген азаматтарға жұмыс ұсынылды. Кәсіпкер өзіне тиесілі жердің нысаналы мақсатын өзгертуді сұранса, инвестор инвестициялық жобасын таныстырды.
Тұрғындардың өтініш-тілектерін мұқият тыңдаған аудан әкімі Еркеғали Амантайұлы көтерілген мәселелер назардан тыс қалмайтынын жеткізіп, шешілуін өз бақылауына алатынын айтты.
Айта кетейік, аудан әкімінің жеке қабылдауына жазылуды Төлеби ауданы әкімі аппаратының әкімшілік және құжаттандыруды қамтамасыз ету бөлімі жүргізеді. Қабылдауға е-otinish бірыңғай базасы арқылы немесе әкімшілік және құжаттандыруды қамтамасыз ету бөліміне келіп, жазбаша өтініш тастау және телефон арқылы жазылуға болады.
Төлеби ауданы әкімінің баспасөз қызметі.
