Қаңтардың 18-20-сы күндері Кентау қаласында Бекзат Саттарханов атындағы №1 БЖСМ спорт кешенінде 2007-2008 жылы туған жасөспірімдер арасында самбодан Түркістан облысының чемпионаты өтті. Дүбірлі сайысқа облыс көлеміндегі барлық спорт мекемелерінен 300-ге жуық жас самбошылар қатысты. Аламан бәйгеде аудандық №3 балалар мен жасөспірімдер спорт мектебінің шәкірттері де өз өнерлерін көрсетті.
Шәкіртіміз Тілеуберді Сапаржан 88 кг салмақ дәрежесінде ІІ орынға қол жеткізіп, чемпионаттың күміс медаліне ие болды. Чемпионаттың жүлдегер спортшылары Түркістан қаласында ақпан айының 5-9-ы күндері өтетін Қазақстан Республикасының чемпионатына жолдамаға ие болды.
Ал қыздарымыз Ұзақбаева Ақжібек 44 кг салмақта, Ахметова Салтанат 78 кг салмақта Азия чемпионатының жүлдегерлері әрі Түркістан облысының чемпиондары болғандықтан, республикалық чемпионатқа ешқандай іріктеусіз-ақ қатысатын болды.
Шәкірттерімізге және жаттықтырушылары самбодан Әлем чемпионы Мәди Нәбиевке алдағы уақытта болатын ҚР Чемпионатында сәттілік серік болып, жеңіс тұғырынан көрініп, алтыннан алқа тағуларына тілектеспіз!
Н.КЕНБАЕВ,
аудандық №3 балалар мен жасөспірімдер спорт мектебінің әдіскері.
