Аудан әкімі Еркеғали Әлімқұлов Көксәйек ауылдық округіндегі 100-ден асқан қазыналы қариялардың шаңырағында болып, ақ тілегін білдірді:
– Ұрпағыңыз үмітіңізді ақтап, мерейіңізді өсірер мақтанышыңызға айналсын. Алланың берген жасын мазмұнды да мағыналы өткізуге, немере, шөбереңіздің қызығын көре беруіңізге тілектеспін. Жанұяңызға құт-береке, деніңізге саулық тілеймін, – деді құттықтау сөзінде аудан әкімі.
Қаңтар айының алғашқы күні дүниеге келген Құралай Оразбаева 105 жасқа, 15 қаңтар күні Пернекүл Бектемірова 101 жасқа толды.
Жастық шақтары сұрапыл соғыс жылдарына тұспа-тұс келіп, азапты күндерді бастан өткерген, қара жұмыспен шыңдалған әжелер бүгінде ұрпағының ортасында бақытты ғұмыр кешуде. Ақ жаулықты кейуаналар туған күндерімен арнайы құттықтап келген аудан басшысы Еркеғали Амантайұлына алғыстарын айтып, ақ батасын берді.
Жалпы, ауданымызда жүз жасаған 10-ға жуық қария бар.
«Төлеби-ақпарат».
