Тәуелсіздік күні мерекесінің қарсаңында Төлеби ауданының мамандандырылған мектеп-интернатының география пәні мұғалімі Айтинбетов Қайрат Сапаралыұлы жас ұрпақты оқыту және тәрбиелеу ісіндегі елеулі табыстары үшін педагогтардың жоғары наградасы – «Ыбырай Алтынсарин» төсбелгісімен марапатталды.
Қайрат Сапаралыұлы – Ленгір қаласының тумасы. Ол 2000 жылы Ленгір қаласындағы №2 Шоқан Уәлиханов атындағы орта мектепті бітірген соң Шымкенттегі М.Әуезов атындағы Оңтүстік Қазақстан мемлекеттік университетіне оқуға түскен. Осы оқу орнында төрт жыл білім алып, тарих және география пәнінің мұғалімі мамандығы бойынша бітірген.
Еңбек жолын 2004 жылы Ленгір қаласындағы №4 Қ.Сәтбаев атындағы орта мектепте тарих және география пәнінің мұғалімі болып бастап, осы білім ордасында 2012 жылға дейін шәкірт тәрбиеледі. 2013 жылдан бастап Төлеби ауданының мамандандырылған мектеп-интернатында география пәнінің мұғалімі болып, шәкірттерге білім мен тәрбие беруде. Қайрат Сапаралыұлы – шебер санатты білікті ұстаз.
А.АСҚАРҚЫЗЫ.
