Чемпион болу – тек жеңіс емес, ол адамның ерік-жігері мен мінезінің шыңы. Бұл жылдар бойғы тынымсыз еңбек пен өзіңді өзің жеңудің нәтижесі. Чемпион болу ең алдымен мақсат қоюдан басталады. Жай ғана армандау жеткіліксіз. Нақты бағыт, сенім және табандылық қажет. Бұл жолда күнделікті жаттығу дағдыға айналған әдет болуы тиіс. Себебі әрбір қадам – үлкен жеңіске апаратын баспалдақ.
Тәртіп пен өзін-өзі бақылау – нағыз спортшының серігі. Дұрыс тамақтану, уақытылы демалу, зиянды әдеттерден бас тарту – бұл жай шектеу емес, мақсатқа жетудің шарты. Ал жеңіліс – тоқтау емес, өсу мүмкіндігі. Чемпион әр құлаған сайын күш-жігерін жинап қайта тұрады. Бапкердің бағыт-бағдары, отбасының қолдауы да спортшыға дем береді. Жеңіс – жеке күштің ғана емес, ұжымдық сенімнің жемісі.
Мәди НӘБИЕВ, дзюдо мен самбо күресінен халықаралық дәрежедегі спорт шебері. Дзюдо мен самбо күресінен Шеберлер арасындағы әлем чемпионы:
«Мен үшін әлем чемпионы болу – ақталған еңбек, төзімділік, мақсатқа ұмтылудың нәтижесі. Халықтың үкілеген үмітін ақтау жолында сүрініп, қайта тұрар сәттер болады. Сол сәтте ес жинап, бой түзеуіме септігін тигізген Бауыржан Момышұлының мінезі мен ұстанымы. Бұл нағыз жігіт бойынан табылуы қажет.
Жеңіс тұғырына шығып, көк туымыз көкке көтеріліп, алтын жүлдені қанжығаға байлап, Әнұранымызды зор тебіреніспен шырқаған сәтті ешбір сезіммен айырбастамас едім. Менің жеңісім – елдің жеңісі».
Әбіш ПЕРДАЛЫ, дзюдодан Қазақстан чемпионы:
«Спортта жоғары нәтижеге жету үшін алға өрлеу қажет. Айтуға оңай болуы мүмкін. Бірақ адам оны спортпен айналысқанда ғана түсінеді. Мен жаттығу залына уақытылы баруды дағдыға айналдырдым. Дегенмен түрлі жарақаттар кедергі болды. Менің жетістікке жететініме сенім білдірген бірден-бір жан – ол менің әкем. Жеңіске жету бала кезден арманым болғандықтан, түрлі сыннан сүрінбей өтуге көмектесті. Міне еңбегім еш кетпей, дзюдодан Қазақстан чемпионы болдым».
Сұхбаттасқан
Батырхан АХАЙ,
ҚазҰУ журналистика факультетінің
II курс студенті.
