Ұстаз туралы ұлылардан қалған даналық тұжырымдар, нақыл сөздер аз емес. Қазақстанның халық жазушысы Сәбит Мұқанов: «Мұғалім деген ат – қасиетті ат. Мұғалім деген аттан таза еңбекті сүйетін мамандық иесі деген сөзді ұғынады. Елдің надандығымен алысатын адам мұғалім» десе, жазушы, Қазақстан Ұлттық Ғылым академиясының академигі Зейнолла Қабдолов «Ұстаздық ету – уақыт ұту емес, өзгенің бақытын аялау, өзіңнің уақытыңды аямау. Бірақ бұған өкінбеу керек. Жер үстінде адам тәрбиелеуден асқан абыройлы іс, ардақты жұмыс жоқ. Ұстаздық – ұлы нәрсе» деп мұғалім мамандығының қадір-қасиетін ерекше атап көрсеткен.
Осындай абыройлы да ардақты мамандық иелерінің бірі Эльмира Турабаева «Үздік мұғалім» атанған. Қаладағы №1 мектеп-гимназияда қазақ тілі мен әдебиеті пәндерінен дәріс беретін ұстаздың ауданда үздіктер қатарынан көрінуі жайдан-жай емес. Эльмира Әскербекқызының шәкірттері аудандық, облыстық, республикалық білім бәйгелерінде жүлдегерлер қатарынан көрініп жүр. Ал шәкірт жетістігі ұстаздың кәсіби біліктілігі мен шеберлігінің жемісі екені даусыз. Мәселен, 2022 – Балалар жылында қазақ тілінің ұлтаралық қатынас тілі болуына ықпал ету, Қазақстандағы түрлі этнос балаларының мемлекеттік тілді үйренуге деген құлшынысын арттыру мақсатындағы Қазақстан халқы Ассамблеясының «Мың жүйрік» республикалық ағартушылық жобасына қатысқан Эльмира Әскербекқызының шәкірті 3-сынып оқушысы Ульяна Почанина «Ертегілер әлеміне саяхат» бағыты бойынша 1-орынды жеңіп алды. Ал ұстаздың өзі жеңімпаз шәкірттің жетекшісі ретінде Алғыс хатпен марапатталды. Бұл байқауға республикамыздың барлық өңірінен мемлекеттік тілді еркін меңгерген 5–12 жас аралығындағы 531 бала 4 бағыт бойынша бақ сынады.
Бұған дейін де әр жылдары түрлі байқаулар мен олимпиадаларда шәкірттері жеңіс тұғырынан түскен емес. Анаш Мадихан есімді шәкірті облыстық Махамбет оқуларының жүлдегері болса, Арқат Сәрсенбай «Жыр алыбы – Жамбыл» атты, Мәшһүр Жүсіп оқуларының облыстық, республикалық кезеңдерінің бас жүлдегері. Қонысбек Ардана – республикалық «Жас дарын – 2021» байқауының жүлдегері. Сонымен қатар Эльмира Турабаева ғылыми жоба байқауларының жеңімпаздарын да дайындаған. Оның Андас Әділет, Сәбит Динара, Шадымаханбет Гүлдана сынды шәкірттері аудандық, облыстық, республикалық кезеңдерде жеңіс тұғырынан көрініпті. Байниязова Жания, Тастанбек Жанерке, Әбдіхан Аяулым есімді оқушылары қазақ тілі мен әдебиеті пәндерінен аудандық олимпиадада жеңімпаз атанған. «Қазақтың нұры – Абайдың жолы» облыстық байқауында шәкірті Асланбек Ернұр ІІ орыннан көрінсе, оқушысы Асланбек Ернұр – І республикалық Абай оқуларының жеңімпазы.
Оқушылардың әдебиетке қызығушылығын оятып қана қоймай, оларды түрлі байқауларға дайындап, жүлдегерлер қатарына қосу үшін қаншама еңбек сіңіру керектігі айтпаса да түсінікті.
Эльмира Әскербекқызы өзі туып-өскен Қайнар ауылындағы Карл Маркс атындағы (қазіргі Қайнар) орта мектепті 1989 жылы бітірген. 1990 жылы Қ.А.Ясауи атындағы халықаралық қазақ-түрік университетінің Шымкент институтына оқуға түскен.
Үздік мұғалім – қазақ тілі мен әдебиеті мамандығы бойынша педагогика ғылымдарының магистрі, педагог-зерттеуші.
Э.Турабаева «Жылдың үздік мұғалімі атанғаным еңбегімнің бағаланғаны деп білемін. Бұл марапат өз жұмысыма бұрынғыдан да жоғары жауапкершілікпен қарауға міндеттейді әрі десе ерекше құлшыныспен атқаруға жігерлендіреді» дейді.
А.ИМАНАЛИЕВА.
