Жұмысшы мамандықтар жылында жұмысшылардың қоғамдағы маңызды орнын көрсету, беделін көтеру мақсатында адал еңбекпен нәпақасын тауып жүрген жұмыскерлерді марапаттау – олардың еңбегін бағалаудың және қоғамға танытудың тиімді жолы. Бұл өз кезегінде олардың жұмысқа құлшынысын арттырып, болашақта жоғары нәтижелерге жетуге ықпал етіп қана қоймай, жастардың жұмысшы мамандықтарына қызығушылығын арттыруға да мүмкіндік береді.
Аудан әкімі Еркеғали Әлімқұловтың бастамасымен еңбек адамына құрмет көрсету мақсатында жұмыс жоспары бекітіліп, жыл бойы түрлі деңгейдегі іс-шаралар ұйымдастырылмақ.
Өткен аптада аудандық жұмыспен қамту және әлеуметтік бағдарламалар бөлімінде ұзақ жылдар бойы еңбек етіп жүрген 10 қызметкерге, атап айтқанда, Тасболатов Ералхан, Абдукадырова Мұғалима, Шалдарбек Ақтөре, Рашева Гүлнара, Найманов Қайрат, Айдарова Гүлмира, Үсібалиева Альмира, Ешімбетова Бибайша, Крабаева Раиса, Қалшораева Нышанға аудан әкімінің Алғыс хаты табысталып, Шымкент қаласындағы Жұмат Шанин атындағы театрға «Танакөз» қойылымына билет тарту етілді.
Аудан әкімінің атынан марапат пен сый-сияпатты ұсынған аудан әкімінің орынбасары Бағдатбек Жанғазиев өздерінің еңбекқорлығымен, күш-жігері мен адал еңбегі арқылы қоғамның дамуына елеулі үлес қосып жүрген азаматтарға ізгі тілегін арнап, әлеуметтік саладағы еңбектеріне алғысын білдірді.
А.ИМАНАЛИЕВА.
