Тасарық ауылында ақпанның 14-16-сы күндері аралығында құсбегіліктен жасөспірімдер мен жастар арасындағы Қазақстан Республикасының XVI чемпионаты өтті. Айтулы шарада еліміздің 8 облысы мен 2 қаласынан 100-ден астам сайдың тасындай іріктелген саятшылар қатысып, қазақтың нағыз құсбегілік өнерін паш етті. Жарыстың алғашқы күні жасөспірімдер, екінші күні жастар саятшылық шеберліктерін көрсетті. Бас төреші Жомарт Кеуенов чемпионаттың қазіргі таңда құсбегілік өнерге деген жастардың қызығушылығының артып келе жатқанының, мықты жас құсбегілердің көп екенінің дәлелі екенін атап айтты.
Жарыста құсбегілер өздері баптаған қаршыға, ителгі, бүркіт сынды құстармен шеберлігін көрсетіп, бақ сынасты.
Құсбегілік жарысының салтанатты ашылуында Түркістан облысының дене шынықтыру және спорт басқармасы басшысының міндетін атқарушы Алмасбек Нақыпбеков, ҚР құсбегілік федерациясының вице-президенті Бағдат Мүптекеқызы, құсбегіліктен мемлекеттік жаттықтырушы Күнтуған Базарбек және аудан әкімінің орынбасары Бағдат Жанғазиев, аудандық мәслихат төрағасы Нұрлан Қойбағаров құттықтау сөз сөйлеп, құсбегілік өнерді серік еткен жастарға сәттілік тіледі.
Чемпионат қорытындысы бойынша үздіктер жүлдегер атанып, марапатталды.
Құсбегілердің жарысы терең біліктілікті қажет ететін өнерді, қыран құстарды баптаудың ғасырлар бойы жинақталған мол тәжірибесін ұмыт қалдырмай, ұрпақтан ұрпаққа жеткізу мақсатында ұйымдастырылып келеді.
«Төлеби-ақпарат».
