«Таза Қазақстан» республикалық акциясы табиғатты аялауға, қоршаған ортаны таза ұстауға, сонымен қатар экологиялық заңнаманы бұзу фактілерін анықтауға, жолын кесуге, сондай-ақ елді мекендерді көгалдандыру және абаттандыру жұмыстарын жандандыруға бағытталған.
Республикалық акция аясында Ленгір қаласы әкімі аппаратының қызметкерлері учаскелік полиция инспекторларымен бірлесе белгіленбеген орындарға қоқыс тастау, қоршаған ортаны ластау, ортақ пайдаланатын орындардағы тәртіп қағидаларын бұзу, жолдар мен жол құрылыстарын зақымдау жайттарын анықтау бойынша рейдтік іс-шаралар атқаруда.
Қала әкімдігі қызметкерлері мен тәртіп сақшылары ленгірліктер мен қала қонақтарын қоғамдық орындарда және көшеде тазалықты сақтауға, абаттандыру ережелерін бұзбауға, сондай-ақ қоршаған ортаны қорғауға шақырады.
– «Осындай рейдтік іс-шаралар жиі жүргізіліп тұрады. Тұрғындарға тиесілі аумақтарда күл-қоқыс, құрылыс қалдықтары, қураған ағаш бұталары, т.б. шашылып жатқан қоқыстар анықталған жағдайда, хаттама толтырылып, айыппұл салынатынын ескертеміз», – дейді қала әкімі М.Жұмабаев.
«Төлеби-ақпарат».
