Өткен аптада Момынай ауылдық мәдениет клубында Ұлы Жеңістің 80 жылдығына орай «Шабытымның асқары – тамсандырған ауылым!» атты шығармашыл балалардың сурет байқауы өтті. Байқауға аудан мектептерінен 30-ға жуық оқушы қатысты. Байқаудың 1-кезеңінде балалардың еркін тақырыпта салып келген бейнелеу өнері туындылары сарапқа салынса, екінші кезеңде жас суретшілер өздеріне берілген уақытта «Шабытымның асқары – тамсандырған ауылым!» тақырыбында әртүрлі техникада (кескіндеме, акварель, гуашь, аралас техника) сурет салды.
Шығармашыл балалардың қылқаламынан шыққан туындыларға Ә.Қастеев атындағы өнер және дизайн колледжінің оқытушылары: ҚР Суретшілер одағының мүшесі, «Дизайн» бөлімінің меңгерушісі Тастанбеков Асылбек Әмірбекұлы мен оқытушы-модератор, өнертану ғылымдарының магистрі Исаева Назым Мархабақызы қазылық жасады.
Ең үздік деп танылған шығармалардың авторлары жүлделі орындарға ие болды. Олар: І орын иегері – Балықбаев Әділет (суретте ортада), екі ІІ орынның бірі – Чищенко София, екіншісі – Ералхан Гаухар, ІІІ орынға ие болғандар – Сәрсен Шұғыла, Тойымбет Мерей, Сапар Балнұр. Жүлдегер оқушыларға дипломдар мен аудандық мәслихат депутаты Сәкен Мәженовтің демеушілігімен естелік сыйлықтар табыс етілді. Олардың ұстаздары Алғыс хатпен марапатталды. Ал байқауда өнерімен дараланып, белсенділік танытқан оқушыларға сертификат табысталды.
Ғ.Тағаев,
Момынай жалпы білім беретін
мектебінің мұғалімі.
