Ардақты аналар мен қыз-келіншектер, аяулы арулар!
Сіздерді жыл мезгілінің ең көрікті де қуанышты сәті, көктемнің шуақты мерекесі 8 Наурыз – Халықаралық әйелдер күні мерекесімен шын жүректен құттықтаймын!
Әлемдегі барлық жақсылық пен ізгілік бірінші кезекте әйел қауымына тән. Әйел – ошағымыздың ұйытқысы, береке-бірлігіміздің алтын діңгегі. Әйел-ана қашанда ер азаматтарды ерлік пен елдікке, бірлік пен бейбітшілікке жетелеуші, дара тұлға екендігі баршамызға аян. Сондықтан, бір қолымен бесікті, екінші қолымен әлемді тербеткен аналардың қай елде, қандай қоғамда болсын орны ерекше.
Мемлекет басшысы Қасым-Жомарт Кемелұлының тапсырмасымен көпбалалы аналарға жағдай жасау, әлеуметтік жағдайын жақсарту, ана мен бала денсаулығын сақтау бағытында жүйелі жұмыстар атқарылып келеді. Өңірді әлеуметтік нысандармен, мектептермен, медицина нысандарымен қамту жұмысы да қарқынды. Демографиялық өсімі жоғары аймақта бұл жұмыстар жалғасын табады.
Төлеби ауданында 8 мыңнан астам кәсіпкер болса, оның үштен бір бөлігі – қыз-келіншектер. Төлеби ауданында жұмыс істейтін әрбір үшінші кәсіпкер – нәзікжандылар. Сонымен бірге қазақтың қайсар қыздары, ардақты аналары білім беру, медицина саласы, мәслихаттарда, жергілікті әкімдіктерде және өзге де салаларда жемісті еңбек етіп жүр. Қоғамның сан саласында елге еңбек сіңіріп жүргендеріңіз үшін шынайы алғысымызды айтамын.
Даңқты жазушы Ғабит Мүсіреповтің «Ана сұлулығы жүзіндегі мейірімінен көрінеді» деген сөзі бар. Сіздер мейірім мен сұлулықтың, ізгілік пен даналықтың қайнар көзісіздер.
Сіздерді төл мерекелеріңізбен құттықтай отырып, ұзақ өмір, баянды бақыт тілеймін! Отбасыларыңыз аман, әр күндеріңіз шуақты болсын! Қызғалдақтай құлпырған қарындастарымыз бақытты, бүлдіршін қыздарымыз аман болсын! Әр отбасыға береке, ынтымақ дарып, қуанышты күндер көп болып, шаңырақтар шаттыққа тола берсін!
Ізгі ниетпен, аудан әкімі Е.Әлімқұлов.
