Вакцинация – балалардың денсаулығы мен қауіпсіздігінің кепілі

Сәуір айының соңында Дүниежүзілік денсаулық сақтау ұйы-мының бастамасы бойынша Еуропа аймағында, соның ішінде Төлеби ауданында да «Вакциналар әрбір ұрпақ үшін жұмыс істейді» ұранымен Еуропалық иммундау апталығы өтеді. Дәрігер ретінде мен бұл апталықты жай ғана медициналық шара емес, «балаларымыз ауырмасын» деген ізгі ниеттен туған үндеу деп білемін.

Неге вакцина туралы көп айтамыз?

Шыны керек, қазір көптеген қауіпті ауруларды (мысалы, по-лиомиелит немесе дифтерия) ұмыта бастадық. Бұл жақсы ма? Әрине, жақсы. Бірақ бұл аурулар өздігінен жойылып кеткен жоқ, оларды вакцина «құлыптап» ұстап отыр. Егер біз егуден жаппай бас тартсақ, ол «құлып» ашылып, аурулар қайтадан оралады. Соңғы кездегі қызылша мен көкжөтелдің өршуі – соның алғашқы белгілері.

Ата-аналардың күмәні орынды ма?

Кез келген ата-ана баласының денсаулығы үшін уайымдайды. Интернеттегі неше түрлі қауесеттерді оқып, қорқуыңыз – заңдылық. Бірақ бір нәрсені түсіну керек: вакцина – бұл ағзаны ауруға қарсы «жаттықтыру». Аурудың өзіне қарағанда, оған қарсы егу қауіпсіз.

Вакцина деген не?

Бұл – баланың ағзасына берілетін «дайындық сабағы». Ол ба-ланы ауыртпайды, тек нағыз вирус келгенде иммунитеттің оған қалай төтеп беру керектігін үйретеді.

Ғылым мен тәжірибе мынаны дәлелдеп отыр:

Сенімділік: Вакцина – әлем бойынша миллиондаған баланың өмірін сақтап қалған ең қауіпсіз құрал.

Қамқорлық: Балаңызды ектіру арқылы сіз оған дені сау болашақ сыйлайсыз.

Ортақ үй: Біздің балаларымыз бір аулада ойнайды, бір мектепке барады. Бір-бірімізді қорғау – біздің ортақ парызымыз.

Құрметті ата-аналар, «екпе – жай ғана формальды дүние» деп қарамаңыздар. Бұл – балаңыздың болашақтағы денсаулығына салынған ең үлкен инвестиция. Бала ауырып қалғанда ем із-дегенше, ауырмайтын жолды қазір таңдайық.

Төлеби аудандық ауруханасында профилактикалық екпелер арнайы дайындықтан өткен мейіргерлермен мамандандырылған егу кабинеттерінде жүргізіледі.

Егер екпе бойынша сұрақтарыңыз болса, көршіден немесе әлеуметтік желіден сұрамай, емханаға келіңіздер. Біз әрқашан ашық сөйлесуге, әр екпенің маңызын түсіндіруге дайынбыз.

Балаларымыз аман, болашағымыз жарқын болсын!

 

Б.АГМАНОВА,

Төлеби аудандық ауруханасының эпидемиолог дәрігері.