ЕҢБЕГІ ЕЛЕНІП, МЕДАЛЬМЕН МАРАПАТТАЛДЫ

28 маусым – Бұқаралық ақпарат құралдары қызметкерлері күніне орай Түркістан қаласында БАҚ өкілдеріне арналған салтанатты іс-шара өтті. Мерекелік жиында ақпарат саласының дамуына өлшеусіз үлес қосып жүрген бірқатар журналистер мен сала ардагерлері мемлекеттік және ведомстволық наградалармен марапатталды.

Салтанатты жиында «Төлеби туы» қоғамдық-саяси газетінің бас редакторы Рахманқұлов Әбдімәлік Түймебекұлы көп жылғы жемісті еңбегі мен отандық журналистиканың дамуына қосқан сүбелі үлесі үшін «Еңбек ардагері» медалімен марапатталды.

Әбдімәлік Түймебекұлы – саналы ғұмырын журналистика саласына арнаған тәжірибелі қаламгер әрі білікті басшы. Оның жалпы еңбек өтілі – 54 жыл болса, оның 51 жылы бұқаралық ақпарат құралдары саласымен тікелей байланысты. Ол өзі басқарып отырған «Төлеби туы» газетінде 51 жылдан бері үздіксіз еңбек етіп келеді.

Ұзақ жылдар бойы аудандық басылымның өркендеуіне зор үлес қосқан бас редактордың жетекшілігімен «Төлеби туы» газеті облыстағы беделді басылымдардың біріне айналып, облыстық бұқаралық ақпарат құралдары арасындағы байқауларда бірнеше мәрте жеңімпаз атанып, облыс әкімінің арнайы сыйлығына ие болды. Сонымен қатар, 2006–2019 жылдар аралығында бес рет «Ең үздік редактор» номинациясын жеңіп алды.

Әбдімәлік Түймебекұлы – талай жас журналистің кәсіби қалыптасуына жол ашқан тәлімгер. Оның тәлім-тәрбиесін көрген көптеген шәкірттері бүгінде республикалық және облыстық бұқаралық ақпарат құралдарында жемісті еңбек етіп жүр.

Еңбек жолындағы табыстары жоғары бағаланып, әр жылдары Қазақстан Республикасы Президентінің Жарлықтарымен бірнеше мерекелік медальдармен, 2018 жылы «Ерен еңбегі үшін» мемлекеттік медалімен марапатталған. Сондай-ақ «Қазақстанның Құрметті журналисі» атағының иегері, ҚР Мәдениет және ақпарат министрлігінің «Ақпарат саласының үздігі» төсбелгісімен, «Облыстың дамуына қосқан үлесі үшін» мерекелік медалімен наградталған. Ол – Төлеби ауданының Құрметті азаматы.

Бұл жолғы «Еңбек ардагері» медалі – Әбдімәлік Түймебекұлының жарты ғасырдан астам уақыт бойы ұлттық журналистика мен өңірлік баспасөздің өркендеуіне сіңірген ерен еңбегіне көрсетілген лайықты құрмет.

Әріптесімізді жоғары марапатымен шын жүректен құттықтап, шығармашылық табыс, зор денсаулық, ұзақ ғұмыр және ел игілігі жолындағы еңбегіне толағай жетістіктер тілейміз.