Ақ халатты абзал жандарға алғыс

Адам өміріндегі ең қымбат байлық – денсаулық. Ал денсаулыққа араша болып, науқастың өміріне үміт сыйлайтын жандар – медицина қызметкерлері. Біз, Ленгір қалалық ауруханасының хирургия бөлімінде ем қабылдаған емделушілер, өзімізге көрсетілген жоғары кәсіби медициналық көмек пен шынайы жанашырлық үшін ақ халатты абзал жандарға шынайы ризашылығымызды білдіреміз.

Ең алдымен, хирургия бөлімінің меңгерушісі Қанат Қуанышұлы Жұмахановқа ерекше алғыс айтамыз. Оның біліктілігі, жауапкершілігі, әр науқасқа жеке көңіл бөліп, сапалы ем ұйымдастыра білуі бізге зор сенім мен үміт сыйлады. Науқастармен сыпайы қарым-қатынасы, өз ісіне деген адалдығы мен кәсіби шеберлігі құрметке лайық.

Сондай-ақ, қалалық аурухана бас дәрігерінің емдеу ісі жөніндегі орынбасары қызметін абыроймен атқарып, бүгінде Қарабұлақ ауруханасының бас дәрігері болып еңбек жолын жалғастырып жатқан Ақберен Асқарұлы Дәуталиевке зор алғысымызды білдіреміз. Оның біліктілігі, кәсібилігі мен адамгершілік қасиеттері көптеген науқастың сауығып кетуіне өз үлесін қосты. Жаңа қызметінде де толағай табыстар мен ел игілігі жолындағы еңбегіне сәттілік тілейміз.

Хирургия бөлімінің аға мейіргері Гүлзира Сәтбайқызы Баятановаға да айтар алғысымыз шексіз. Оның мейірімді жүзі, жылы сөзі, ұқыптылығы мен қамқорлығы науқастардың тезірек сауығып кетуіне үлкен демеу болды. Бөлімдегі орта буын медицина қызметкерлерінің жұмысын үйлестіріп, әрбір емделушіге ерекше ықыласпен қарайтын жанашырлығы үшін зор ризашылық білдіреміз.

Сонымен қатар, хирургия бөлімінің барлық дәрігерлеріне, мейіргерлеріне, кіші медицина қызметкерлеріне адал еңбектері, төзімділіктері мен жанашырлықтары үшін шын жүректен рақмет айтамыз. Сіздердің әрбір күнгі қажырлы еңбектеріңіз талай адамның өмірін сақтап, денсаулығын қалпына келтіруге бағытталған игілікті іс екені сөзсіз.

Сіздерге зор денсаулық, отбасыларыңызға амандық, еңбектеріңізге толағай табыс, кәсіби жетістіктер тілейміз. Ақ халаттарыңыздың абыройы әрдайым асқақ болсын!

Ізгі тілекпен,
Ленгір қалалық ауруханасының хирургия бөлімінде ем алған емделушілер.