Халық денсаулығы – мемлекеттің басты байлығы

Президентіміз Қасым-Жомарт Тоқаев: «Мемлекеттің басты байлығы – адам. Ал адамның басты байлығы – денсаулық» деп атап өткен болатын. Бұл қағида денсаулық сақтау саласы қызметкерлеріне жүктелер міндеттің қаншалықты маңызды екенін айқын көрсетеді.

Бүгінде Ленгір қалалық емханасының ұжымы тұрғындарға сапалы әрі қолжетімді алғашқы медициналық-санитарлық көмек көрсету бағытында аянбай еңбек етіп келеді. Емханада 37 мыңға жуық тұрғын тіркелген. Олардың қатарында Ленгір қаласының ғана емес, емханаға қарасты жақын маңдағы елді мекендердің тұрғындары да бар. Әрбір азаматтың денсаулығына жауапкершілікпен қарап, уақытылы әрі сапалы медициналық көмек көрсету – біздің басты міндетіміз.

Халыққа медициналық қызмет көрсетудің қолжетімділігін қамтамасыз ету мақсатында емхана құрамында 2 дәрігерлік амбулатория, 3 фельдшерлік-акушерлік пункт және 21 учаскелік аймақ жұмыс істейді. Бұл құрылым алғашқы медициналық көмекті тұрғындарға барынша жақындатуға, профилактикалық жұмыстарды тиімді ұйымдастыруға және созылмалы ауруларды тұрақты бақылауда ұстауға мүмкіндік береді.

Ленгір қалалық емханасы 2015 жылы пайдалануға берілген заманауи ғимаратта орналасқан. Соңғы жылдары медициналық мекеменің материалдық-техникалық базасы едәуір нығайып, халыққа сапалы қызмет көрсетуге қолайлы жағдай жасалды. Заманауи диагностикалық құрал-жабдықтар, цифрлық медициналық жүйелер, жайлы қабылдау бөлімдері мен қажетті инфрақұрылым емделушілерге қолайлы орта қалыптастыруға ықпал етуде.

Бүгінде емханада 296 қызметкер еңбек етеді. Олардың қатарында тәжірибелі дәрігерлер, білікті мейіргерлер, фельдшерлер, зертхана мамандары және техникалық қызметкерлер бар. Әрқайсысы өз ісіне үлкен жауапкершілікпен қарап, тұрғындардың денсаулығын сақтауға өлшеусіз үлес қосып келеді. Ұжымымыздың ең басты құндылығы – кәсібилік, жауапкершілік және адамға деген жанашырлық.

Емханада жалпы тәжірибелік дәрігерлермен қатар түрлі бейінді мамандар қызмет көрсетеді. Дәрігерлер өздерінің кәсіби білімдерін тұрақты жетілдіріп, заманауи емдеу тәсілдерін меңгеріп келеді. Бұл көрсетілетін медициналық көмектің сапасын арттыруға және тұрғындардың сенімін нығайтуға мүмкіндік береді.

Біздің жұмысымыздың негізгі бағыты – аурудың алдын алу. Осы мақсатта профилактикалық тексерулер, ұлттық скринингтік бағдарламалар, вакцинация, диспансерлік бақылау, жүкті әйелдер мен балалардың денсаулығын қорғау, созылмалы сырқаттарды динамикалық бақылау жүйелі түрде жүзеге асырылуда. Өйткені ауруды емдегеннен гөрі оның алдын алған әлдеқайда тиімді әрі нәтижелі.

Профилактикалық тексерулер, скринингтік бағдарламалар, созылмалы аурулардың алдын алу, жүкті әйелдер мен балалардың денсаулығын бақылау, вакцинация және салауатты өмір салтын насихаттау – күнделікті жұмысымыздың ажырамас бөлігі. Ауруды емдегеннен гөрі оның алдын алған әлдеқайда тиімді екенін халықтың да санасына сіңіру маңызды.

Емдеу ісінде күндізгі стационар қызметінің де маңызы зор. Ленгір қалалық емханасында күндізгі стационар жұмыс істейді. Сонымен қатар Сұлтанрабат және Аққұм дәрігерлік амбулаторияларының әрқайсысында 5 төсек-орындық күндізгі стационар тұрғындарға қызмет көрсетеді. Бұл ауыл тұрғындарының шалғайға бармай-ақ қажетті ем қабылдауына мүмкіндік беріп, медициналық көмектің қолжетімділігін арттыруда.

Мемлекет басшысының тапсырмасына сәйкес елімізде алғашқы медициналық-санитарлық көмекті дамытуға ерекше көңіл бөлінуде. Себебі халық денсаулығын нығайту ең алдымен профилактикадан басталады. Осы бағытта біздің ұжым тұрғындардың денсаулық мәдениетін қалыптастыруға, салауатты өмір салтын насихаттауға және аурулардың ерте кезеңде анықталуына басымдық береді.

Мемлекет тарапынан денсаулық сақтау саласына ерекше көңіл бөлініп келеді. Соның нәтижесінде медициналық ұйымдардың материалдық-техникалық базасы жаңартылып, цифрлық технологиялар кеңінен енгізілуде. Міндетті әлеуметтік медициналық сақтандыру жүйесінің дамуы тұрғындардың сапалы медициналық көмекке қолжетімділігін арттыруға мүмкіндік беріп отыр.

Әрине, медицина саласында шешімін күткен мәселелер де жоқ емес. Заманауи диагностикалық құралдарды жаңарту, медициналық жабдықтарды толықтыру, инфрақұрылымды жетілдіру – уақыт талабынан туындаған міндеттер. Дегенмен қандай жағдайда болмасын біздің ұжымның басты құндылығы – адам өмірі мен денсаулығы. Сондықтан әрбір пациентке жанашырлықпен қарап, кәсіби міндетімізді адал атқаруға күш саламыз.

Біздің жетістіктеріміз – ұжымдық еңбектің жемісі. Дәрігерлер, мейіргерлер, зертхана мамандары, фельдшерлер, санитарлар, тіркеу бөлімінің қызметкерлері және барлық техникалық персонал бір мақсат жолында еңбек етеді. Әрқайсысының еңбегі құрметке лайық.

Құрметті әріптестер!

Сіздерді кәсіби мерекелеріңізбен шын жүректен құттықтаймын! Сіздердің адал еңбектеріңіздің арқасында мыңдаған адамның денсаулығы сақталып, талай отбасының үміті ақталуда. Бұл – үлкен абырой әрі зор жауапкершілік.

Баршаңызға зор денсаулық, отбасыларыңызға амандық, еңбектеріңізге толайым табыс, кәсіби биіктер мен халықтың шынайы алғысын тілеймін! Әрдайым абыройларыңыз асқақ, мерейлеріңіз үстем болсын!

 

Қабылет АБЕНОВ,

Ленгір қалалық емханасының бас дәрігері.