Өмірін адам жанына араша түсуге арнаған

Медицина – тек мамандық емес, ол – үлкен жауапкершілік пен жанқиярлықты талап ететін өмірлік таңдау. Осы қасиеттерді бойына сіңіріп, ондаған жыл бойы адам өмірі үшін күресіп, талай жанға үміт сыйлаған тәжірибелі дәрігерлердің бірі – анестезиолог-реаниматолог Қамбаров Мырзахан Қалмаханұлы.
Мырзахан Қалмаханұлы 1960 жылдың 29 қазанында дүниеге келген. Мектептің сегізінші сыныбын аяқтағаннан кейін-ақ медицина саласын таңдауды мақсат етіп, 1975 жылы Шымкент қаласындағы медициналық училищеге оқуға түседі. 1978 жылы оқуын тәмамдап, еңбек жолын Ленгір қаласындағы санитариялық-эпидемиологиялық станцияда бактериологиялық лаборант ретінде бастайды.
Жас маман көп ұзамай әскери борышын өтеуге аттанып, 1979–1981 жылдары Кеңес Армиясы қатарында қызмет атқарып, Отан алдындағы азаматтық міндетін абыроймен орындап келеді. Әскерден оралған соң санитариялық-эпидемиологиялық станцияда санитарлық дәрігердің көмекшісі болып еңбек етіп, кәсіби тәжірибесін шыңдай түседі.
Дегенмен оның басты арманы жоғары білімді дәрігер атану болды. Осы мақсатпен 1984 жылы Алматы мемлекеттік медицина институтына оқуға түсіп, 1990 жылы диплом алады. Кейін Шымкент қаласындағы бастапқы медициналық-санитариялық көмек жүйесінде анестезиолог-реаниматолог мамандығы бойынша интернатурадан өтіп, аса күрделі әрі жауапты саланың маманы ретінде қалыптасады.
1991 жылдан бастап Мырзахан Қалмаханұлы Төлеби аудандық ауруханасында анестезиолог-реаниматолог дәрігер болып қызмет атқарып келеді. Бұл – әрбір секундтың, әрбір шешімнің адам өміріне тікелей әсер ететін аса жауапты қызмет. Оның жоғары кәсібилігі, бай тәжірибесі мен сабырлылығы талай науқастың өмірін сақтап қалуға сеп болды.
2004 жылы жансақтау бөлімінің меңгерушісі қызметіне тағайындалып, бұл ұжымды 2026 жылға дейін абыроймен басқарды. Басшылық қызметте жүріп бөлімнің жұмысын жетілдіруге, жас дәрігерлердің кәсіби қалыптасуына және медициналық көмектің сапасын арттыруға өлшеусіз үлес қосты.
2023 жылы зейнеткерлік жасқа жеткенімен, сүйікті мамандығынан қол үзген жоқ. Бүгінде аудандық ауруханада ординатор дәрігер ретінде еңбек етіп, көп жылғы тәжірибесін әріптестерімен бөлісіп, науқастарға сапалы медициналық көмек көрсетуді жалғастырып келеді.
Мырзахан Қалмаханұлының өмір жолы – еңбекқорлықтың, кәсібіне деген адалдықтың және адам өміріне деген ерекше жауапкершіліктің жарқын үлгісі. Ол – ақ халатқа деген адалдығын ұзақ жылдар бойы дәлелдеп келе жатқан, әріптестерінің құрметіне бөленген, жастарға өнеге болатын білікті дәрігер. Мұндай мамандар – денсаулық сақтау саласының мақтанышы әрі кейінгі буын үшін сарқылмас тағылым мектебі.
Медицина қызметкерлері күніне орай адам өмірін сақтауды басты мұрат еткен ардагер дәрігерге шынайы алғысымызды білдіреміз. Деніңізге саулық, отбасыңызға амандық, ұзақ ғұмыр және еңбегіңіздің жемісті болуын тілейміз.