Түркістанда Төлеби ауданының мәдени күні өтті

Түркістан қаласындағы «Керуен Сарай» туристік кешенінде өткен «Өнерлі өлке» фестивалі аясында Төлеби ауданының мәдени күні ұйымдастырылып, өңірдің өнері мен рухани мұрасы көпшілік назарына ұсынылды.
Іс-шара барысында Төлеби ауданының тарихы, мәдениеті, салт-дәстүрі мен бүгінгі жетістіктері қамтылған көрме ұйымдастырылды. Келушілер ауданның әлеуметтік-экономикалық дамуы туралы мәлімет алып, ұлттық нақыштағы қолөнер бұйымдарымен танысты. Төлебилік шеберлердің туындылары қазақ халқының бай мәдени мұрасын айшықтап, көрменің мазмұнын арттыра түсті.
Фестиваль бағдарламасы ұлттық құндылықтарды дәріптеуге бағытталған концерттік қойылымдармен жалғасты. Көрермендер дәстүрлі ән мен күйді, би мен сахналық композицияларды тамашалап, ауданымыздың рухани тынысымен жақынырақ танысуға мүмкіндік алды.
Мәдени кешке Төлеби ауданының Құрметті азаматы, Қазақстан Республикасының мәдениет саласының үздігі, «Дарын» мемлекеттік жастар сыйлығының лауреаты, «Құрмет» орденінің иегері Алтынай Жорабаева қатысты. Танымал әншінің орындауындағы әндер көрермендерге көтеріңкі көңіл-күй сыйлап, көпшіліктің ыстық ықыласына бөленді.
Сонымен қатар аудан өнерпаздары фестивальдің концерттік бағдарламасы мен гала-концертінде өнер көрсетіп, шығармашылық шеберліктерін жоғары деңгейде танытты. Әуелеген ән, күмбірлеген күй, ұлттық би мен мазмұнды қойылымдар көрермендерге ерекше әсер қалдырды.
Киелі Түркістан төрінде өткен Төлеби ауданының мәдени күні өңірдің өнері мен мәдениетін кеңінен насихаттап, ұлттық құндылықтарды ұлықтауға бағытталған тағылымды шара болды.

«Төлеби-ақпарат».