Жуырда Аққұм ауылдық округіне қарасты Аққұм ауылында жаңадан пайдалануға берілген Мұхит Әлі атындағы спорт кешенінде жас спортшылар үшін тағылымы мол кездесу өтті. Төлеби аудандық №3 балалар мен жасөспірімдер спорт мектебінің дзюдо бөлімінің тәрбиеленушілері еліміздің танымал дзюдошыларымен жүздесіп, спорттағы жетістікке жетудің қыр-сырымен танысты.
Кездесуге дзюдодан Әлем Гран-приінің қола жүлдегері, «Қазақстан Барысы» турнирінің жеңімпазы, Астанада өткен «Қазақстан Барысы» Grand Slam турнирінің алтын жүлдегері, халықаралық дәрежедегі спорт шебері Марат Байкамуров пен дзюдо күресінен шеберлер арасындағы әлем чемпионатының қола жүлдегері, Қазақстан Республикасының спорт шебері Нұрдәулет Сихымбаев арнайы қатысты. Атақты спортшылар өздерінің спорттағы алғашқы қадамдары, жеңіске жету жолындағы еңбектері мен тәжірибелері туралы әңгімелеп, кәсіби мансаптарындағы маңызды кезеңдермен бөлісті.
Жас дзюдошылар көкейлеріндегі сұрақтарын қойып, үлкен спортқа жол ашудың тетіктері, жаттығу тәртібі мен табысқа жетудің негізгі қағидалары жөнінде құнды мәліметтер алды. Қонақтар спорттағы жетістіктің басты кілті – еңбекқорлық, тәртіп пен табандылық екенін атап өтіп, қандай қиындық кездессе де алға қойған мақсаттан таймауға шақырды.
Осындай жүздесулер жас спортшылардың жігерін жанып, олардың болашаққа деген сенімін арттыра түсетіні сөзсіз. Белгілі спортшылармен еркін пікір алмасу балаларға ерекше әсер қалдырып, жаңа белестерді бағындыруға ынталандырды.