Құрбан айтта ұлттық құндылықтар ұлықталды

Қасиетті Құрбан айт мерекесі Төлеби ауданында кең көлемде аталып өтті. Аудан орталығындағы «Нұр» мешітінде айт намазы оқылып, мерекеге орай рухани-танымдық әрі ұлттық дәстүрді дәріптейтін іс-шаралар ұйымдастырылды.

Айт намазына жиналған жамағатқа ауданның бас имамы Үсен Саурбаев уағыз айтып, Құрбан айт мерекесінің мұсылман қауымы үшін маңызы зор екенін атап өтті. Сонымен қатар, Қазақстан мұсылмандары діни басқармасы тарапынан жолданған құттықтау лебізін жеткізіп, барша аудан тұрғындарын қасиетті мерекені көтеріңкі көңіл-күйде қарсы алуға шақырды. Бас имам өз сөзінде құрбан шалу рәсімінің мән-маңызы мен сауабы жайында кеңінен түсіндіріп, ізгілік пен жанашырлықтың қоғамдағы орнына тоқталды.

Айт намазы алдында аудандық ардагерлер кеңесінің төрағасы Сейітхан Ахтаев сөз сөйлеп, мешіт жамағаты мен аудан тұрғындарын Құрбан айт мерекесімен құттықтады. Ол өз лебізінде ел бірлігі мен татулықтың маңызын атап өтіп, жиналған қауымға ақ батасын берді.

Қасиетті мерекеде ұлттық салт-дәстүрлер мен құндылықтарды насихаттауға да ерекше мән берілді. «Нұр» мешітінің қызметкерлері, «Әйел-қыздар» секторы және Төлеби спорт клубының директоры Нұргелді Құлышев бастаған мекеме қызметкерлерінің ұйымдастыруымен ұлттық нақыштағы киіз үй тігіліп, келген қонақтарға ұлттық тағамдар мен тәттілер ұсынылды.

Сонымен қатар, ұлттық дәстүр мен рухани құндылықтар сабақтастығын дәріптеген тағылымды шарада ұлттық спорт түрлерінен жарыстар өткізіліп, көпшілікке ерекше көңіл-күй сыйлады.
Осылайша төлебиліктер барлық мешіттерде қасиетті Құрбан айт мерекесін бірлік пен бауырмалдықтың, қайырымдылық пен ізгіліктің мерекесі ретінде жоғары деңгейде атап өтті.

«Төлеби-ақпарат».