Республика чемпионы атанды

Жақында Павлодар қаласында үстел теннисінен 23 жасқа дейінгі жастар арасында Қазақстан Республикасының чемпионаты мәреге жетті. Тасарық ауылындағы Т.Тоғысбаев атындағы жалпы білім беретін мектептің оқушылары осы айтулы жарысқа қатысып, жекелей және жұптасып, аралас жұптасып (бір қыз және ер бала) өнер көрсетуде мерейімізді үстем етті.

Мектеп оқушысы Мерей Серікбай жекелей және жұптық жарыста екі алтын медальді жеңіп алып, чемпион атанды. Чемпионатта Нұрдәулет Алшынбай жұптық жарыста алтын медальді, жекелей біріншілікте қола медальді иеленді.

Жас спортшыларды жарысқа Т.Тоғысбаев атындағы жалпы білім беретін мектептің дене тәрбиесі мұғалімі Балатай Ақмаханов баптап алып барды. Балатай жаттықтырып жүрген Б.Түлкиев атындағы жалпы білім беретін мектептің 10-сынып оқушысы Артай Арапбай шеберлігімен дараланып, қола медаль алды.

Шәкірттері жеңімпаз, жүлдегер атанған ұстазға ауыл азаматтары қолдау көрсетіп, Меккеге мұсылмандық парызын өтеп қайтуға жолдама тарту етті.

С.ҚОНЫСБАЕВ.

Тасарық ауылдық округі.