Аудан орталығында Төлеби баба музейінің құрылысы қарқынды жүргізілуде. Бұл нысан алдағы уақытта өңірдің рухани-тарихи келбетін айшықтайтын ірі орталықтардың біріне айналмақ.
Жоба заманауи сәулеттік талаптарға сай жүзеге асырылуда. Құрылыс жұмыстарын бас мердігер «Caprioc» ЖШС жүзеге асыруда. Құрылыс алаңындағы жұмыстардың барысымен облыстық мәслихат депутаты Дулат Әбіш және Төлеби ауданының әкімі Еркеғали Әлімқұлов арнайы танысып, нысанның сапалы әрі белгіленген мерзімде аяқталуын бақылауға алды.
Музейдің жалпы аумағы 2200 шаршы метрді құрайды. Ғимарат бірнеше экспозициялық залдан тұрады. Мұнда Төлеби бабаның өмір жолы, ел бірлігі жолындағы еңбегі мен тарихи мұрасы кеңінен насихатталатын болады.
Құрылыс жұмыстары 2025 жылдың мамыр айында басталған жобаның жалпы сметалық құны 361,6 миллион теңгеден асады. Жоспар бойынша музей 2026 жылы пайдалануға беріледі.
Айта кету керек, бұл жоба өңірдің тарихи-мәдени мұрасын дәріптеуге бағытталған маңызды бастамалардың бірі. Болашақта музей жергілікті тұрғындармен қатар, туристер үшін де тартымды рухани орталыққа айналады деп күтілуде.
