Алматы қаласында математика, физика және информатика пәндері бойынша өткен XXII Халықаралық Жәутіков олимпиадасының қорытынды марапаттау салтанаты жоғары деңгейде ұйымдастырылды. Білім мен бәсекені ұштастырған бұл халықаралық дода жыл сайын әлемнің үздік жас зияткерлерін бір алаңға жинайды.
Биылғы олимпиадаға 16 мемлекеттен 600-ден астам оқушы қатысып, жаратылыстану-математикалық бағыттағы білімдерін сарапқа салды. Қатысушылар жоғары дайындық пен логикалық ойлау қабілетін талап ететін күрделі тапсырмаларды орындап, өз елдерінің намысын қорғады.
Аталған беделді білім сайысында Төлеби ауданының мамандандырылған мектеп-интернатының 11-сынып оқушысы Жанатбек Нұрхан (суретте сол жақта) математика пәні бойынша жоғары нәтиже көрсетіп, қола жүлдегер атанды. Бұл жетістік – жас дарынның табандылығы мен үздіксіз ізденісінің, сондай-ақ білікті ұстаздардың жүйелі еңбегінің жемісі.
Жанатбек Нұрханның халықаралық деңгейдегі бұл жетістігі Төлеби ауданының білім саласындағы әлеуетін айқындап, жас буынға үлгі болары сөзсіз. Осындай байқаулар оқушылардың ғылымға деген қызығушылығын арттырып, болашақта білікті маман боп қалыптасуына жол ашады.
Жас өренді, оның ата-анасын және білім жолында бағыт-бағдар берген ұстаздарын айтулы жеңісімен құттықтай отырып, алдағы уақытта да биік белестерді бағындыруына тілектестік білдіреміз.
«Төлеби-ақпарат».
