Қазақ халқының ғасырлар бойы қалыптасқан рухани мұрасының маңызды бір бөлігі – ұлттық ойындар. Солардың ішінде асық ойыны ұрпақ тәрбиесінде, дене шынықтыру мен физикалық дамуда айрықша орын алады. Бүгінде бұл көне ойын жаңаша сипат алуда.
Аудандық білім бөліміне қарасты Жаңаұйым жалпы білім беретін мектебінің 4 «Ә» сынып оқушылары Қуанышбай Естай мен Жарқымбек Еркеназ «Ұлттық ойын – асық терапиясы арқылы салауатты ұлт қалыптастыру» тақырыбындағы ғылыми жобасымен аудандық және облыстық кезеңдерде І орынды иеленіп, республикалық кезеңге жолдама алды. Жобаның ғылыми жетекшісі – ізденімпаз ұстаз Қаныбекова Аягөз Әміртайқызы.
Ғылыми жобаның негізгі мақсаты – асық ойынын тек дәстүрлі ойын ретінде ғана емес, терапиялық, спорттық әрі тәрбиелік құрал ретінде жан-жақты қарастыру. Зерттеу нәтижелері асық терапиясының балалардың ұсақ моторикасын дамытуға, қимыл-қозғалыс үйлесімділігін арттыруға, зейін мен логикалық ойлау қабілетін жетілдіруге оң ықпал ететінін дәлелдеді. Сонымен қатар ұлттық ойындар арқылы баланың бойында тәртіп, сабырлылық, ептілік пен төзімділік сияқты маңызды қасиеттер қалыптасатыны анықталды.
Жоба аясында мектеп оқушылары спорттық және ұлттық ойындарды ұштастыра отырып, сабақ арасындағы сергіту сәттерінде қызықты әрі тиімді жаттығуларға тартылды. Жүргізілген сауалнама нәтижесі бойынша оқушылардың 72 пайызы асық ойынының денсаулықты нығайтуға және салауатты өмір салтын қалыптастыруға оң әсер ететінін атап өтті. Бұл деректер жас зерттеушілер еңбегінің практикалық маңызын айқындай түседі. Ұлттық ойындар арқылы баланың физикалық дамуы мен рухани тәрбиесі қатар жүзеге асатыны дәлелденді.
Қуанышбай Естай мен Жарқымбек Еркеназ – мектептегі дарынды әрі үздік оқушылардың қатарында. Олардың ғылымға деген қызығушылығы, ізденімпаздығы мен еңбекқорлығы осындай жоғары жетістіктерге жетелеп отыр. Бұл жеңіс – ұстаз еңбегі мен оқушы талпынысының жемісі ғана емес, ұлттық құндылықтарға деген құрметтің айқын көрінісі.
Алдағы республикалық кезеңде де жас ғалымдардың жоғары нәтиже көрсетіп, ел мерейін үстем ететініне сенім мол. Ұлттық ойын арқылы ұлт болашағына үлес қосып жүрген осындай жас өрендер – ертеңгі салауатты қоғамның берік негізі.
А.ӘУЕЛБЕКОВА,
аудандық білім бөлімінің әдіскері.
