Сәрсенбі күні сегізінші шақырылымдағы аудандық мәслихаттың кезекті, ХХХІ сессиясы болды. Оны аудандық мәслихаттың төрағасы Н.Қойбағаров ашып, жүргізіп отырды.
Депутаттар 2026-2028 жылдарға арналған аудандық бюджет туралы мәселені қарап, 2026 жылға аудандық бюджеттің кірісін 8 миллиард 787 миллион 708 мың теңге, шығындарын 8 миллиард 787 миллион 708 мың теңге көлемінде бекітті. 2025 жылға салық түсімдерінен облыстық бюджетке 50 пайыз мөлшерінде бөлу нормативтері белгіленіп, ауданның жергілікті атқарушы органының 2026 жылға арналған резерві 171 миллион 151 мың теңге сомасында бекітілді.
Сессияда ауданның 2026-2030 жылдарына арналған даму бағдарламасы бекітілді.
Аудан әкімдігі жанындағы үкіметтік емес ұйымдармен өзара іс-қимыл жөніндегі үйлестіру комиссиясының құрамын бекіту туралы шешім қабылданды.
Депутаттар аудандық мәслихаттың және оның аппаратының қызметін қамтамасыз етудің 2026 жылға арналған шығыс сметасы мен аудандық мәслихаттың жұмыс жоспарын бекітті.
Сессияда ауданға сіңірген еңбегі және қоғам өмірінің тиісті салаларындағы ұзақ жылғы жемісті еңбегі үшін қалалық ардагерлер кеңесінің төрағасы Ордабек Абдукаимов, аудандық мәслихат депутаттары Сейдилла Укибаев, Исағали Әшірбеков, аудандық қоғамдық кеңестің мүшесі Абдисаттар Абдихаликов, Аққұм ауылдық округінің әкімі Қайрат Таменов, №3 аудандық спорт мектебінің әдіскері Мадияр Құрбаналиев, Кеңесарық ауылының тұрғыны Есімхан Адеканов, аудандық құрылыс, сәулет және қала құрылысы бөлімінің басшысы Құттымұрат Тұрғынбаев, Сайрам аудандық ауруханасының бас дәрігері Елдос Сұлтанов, қалалық аурухананың бас есепшісі Айнұр Клушева, аудандық аурухананың дәрігері Наралы Асильбеков және аудандық тіркеу және жер кадастры бөлімінің бас маман-тіркеушісі Калия Мусиралиева сынды азаматтарды Төлеби ауданының Құрмет грамотасымен марапаттау туралы шешім қабылданды.
Сессия жұмысына қатысқан аудан әкімі Еркеғали Әлімқұлов ауданның әлеуметтік және экономикалық дамуына жағдай туғызған шешімдер қабылдауға қосқан үлесі үшін депутаттар корпусына рахметін айтып, алдағы уақытта да тізе қоса еңбек етуге үндеді.
«Төлеби-ақпарат».
