Газетіміздің оқырмандары ауданымызда «Умраға жолдама» атты игі бастама жүзеге асырылып жатқанынан хабардар. Қазақстан мұсылмандары діни басқармасының Түркістан облысы, Төлеби ауданының бас имамы Үсен Саурбаевтың бастамасымен дін саласы қызметкерлерін ынталандыру әрі рухани қолдау мақсатында Умра кіші қажылығына жолдама табыстау жобасы әлі де жалғасып келеді.
Бұл игі шараның ерекшелігі – жомарт азаматтардың демеушілігімен жүзеге асатынында. Осындай ізгі амалдың нәтижесінде кезекті жолдама орталық «Нұр» мешітінің тазалықшысы Хансұлу Әуесханқызына бұйырды. Ол бүгінде Умра сапарына аттанып, қасиетті Мекке мен Мәдина қалаларында кіші қажылығын өтеп жүр.
Қарапайым еңбек адамының қасиетті мекенге аттануы – рухани бауырмалдық пен адамгершіліктің айқын көрінісі. Бұл жоба тек бір адамның қажылығымен шектелмей, қоғамда мейірім мен сауапқа деген ұмтылысты күшейтуді, дін қызметкерлерінің еңбегін бағалауды мақсат етеді.
Бас имам Үсен Саурбаев атап өткендей, мұндай игі бастамалар алдағы уақытта да өз жалғасын тауып, көптеген мұсылман жандардың арманына жол ашпақ.
– Алла Тағала баршамызды қайырлы істердің себепкері етіп, екі дүниеде абырой мен береке нәсіп етсін! – деген ақ тілекпен жоба қатысушылары бір-біріне ізгі ниет білдірді.
Жомарттық пен ізгі амалдың осындай жарқын үлгілері қоғамда рухани жаңғырудың, адамдықтың және мейірімнің орнауына сеп болары сөзсіз.
