Аққұм ауылдық округінің құрамындағы Жаңаұйым елді мекенінде ауыл тұрғындары үшін маңызды нысан – 350 орындық жаңа асхана пайдалануға берілді. ҚМДБ Түркістан облысы бойынша өкілдігіне қарасты Жаңаұйым мешітінің жанынан ашылған бұл нысан Мекенбай Сүйінбекұлының демеушілігімен, ауыл имамы Азамат Жанатұлының бастамасы және ауыл азаматтарының қолдауымен жүзеге асты.
Игі шара Құран оқумен басталып, жиында ауданның бас имамы Үсен Саурбаев пен аудандық мәслихат төрағасы Нұрлан Хамзаұлы сөз сөйлеп, асхананың ауыл өмірі үшін маңызын атап өтті. Сондай-ақ атсалысқан азаматтарға облыстың бас имамы Ержан қажы Сматұлы атынан Алғыс хаттар табысталды.
Жиында Жаңаұйымнан шыққан танымал тұлғалар, спорт және өнер өкілдері өз тілектерін жеткізді. Ауыл тұрғындары елге жаңаша үлгідегі асхана сыйлаған Мекенбай Сүйінбекұлына құрмет көрсетіп, ат мінгізіп, шапан жапты.
Жергілікті халықтың бірлігі мен жомарттығын айқын көрсеткен бұл бастама ел игілігіне қызмет ететін маңызды әлеуметтік нысан ретінде бағаланды.
«Төлеби-ақпарат».
