Республика күні қарсаңында еліміздің әр салада абыройлы еңбек етіп жүрген азаматтары марапатталды. Олардың қатарында «Оңтүстік Жарық Транзит» ЖШС Төлеби аудандық электр желілері мекемесінің қызметкері Сармырзаев Нұрғали Иманбайұлы (суретте) да бар. Ол Мемлекет басшысы Қасым-Жомарт Тоқаевтың қолынан «Ерен еңбегі үшін» медалін алды.
Бұл мәртебелі марапат – Нұрғали Иманбайұлының көп жылғы адал еңбегі мен жоғары кәсіби біліктілігінің, жауапкершілігі мен ел игілігі жолындағы қызметінің лайықты бағалануы. Ол ұзақ жылдар бойы энергетика саласында еңбек етіп, аудан тұрғындарын сапалы әрі тұрақты электр қуатымен қамтамасыз ету ісіне зор үлес қосып келеді.
Бұл марапат – Төлеби ауданындағы энергетиктер қауымының ортақ еңбегіне берілген жоғары баға. Аталмыш жетістік сала қызметкерлерін ынталандырып, ел игілігі үшін одан әрі адал қызмет етуге, ел экономикасының маңызды саласын дамытуға серпін бермек.
