Халық рухын жырға қосқан дауылпаз ақын Махамбет Өтемісұлының шығармаларын насихаттау, оның өр рухын өскелең ұрпаққа жеткізу мақсатында ұйымдастырылған облыстық «Махамбет оқулары» ғылыми-шығармашылық байқауы өз мәресіне жетті.
Аталған байқауда ауданымыздың жас өрендері озық өнер көрсетіп, жүлделі орындармен оралды. Олар поэзия, күй өнері және ғылыми жұмыс бағыттарында бақ сынап, әрқайсысы өз білімдері мен таланты арқылы қазылар алқасының жоғары бағасын алды.
«Шашақты найза, шалқар күй» – Махамбет күйлерін орындаушылар бағыты бойынша Бірінші Мамыр жалпы білім беретін мектебінің 8-сынып оқушысы Нұрмахан Мұстафа ІІ орынды иеленді (жетекшісі Жолдасова Гүлмира).
«Тартынбай сөйлер асылмын» – Жас ақындардың өз туындылары бағыты бойынша М.Х.Дулати атындағы жалпы білім беретін мектептің 9-сынып оқушысы Сәрсен Меруерт ІІІ орынға ие болды (жетекшісі Қамытбекова Кәмшат).
«Біз неткен ер, неткен ер? Сергелдеңмен өткен ер» – «Хандар мен ел билеушілер», «Батырлар» тақырыптарының бірін ғылыми тұрғыда қорғау бағыты бойынша Әңгірата жалпы білім беретін мектебінің 11-сынып оқушысы Исахан Балнұр І орынға лайық деп танылып, республикалық кезеңге жолдама алды. Жеңімпаз шәкірттің жетекшісі Төлеметова Қарашаш.
Бұл жеңіс – шәкірттеріміздің талпынысы мен ұстаздардың тынымсыз еңбегінің нәтижесі. Жеңімпаздарды және оларды дайындаған ұстаздарын шын жүректен құттықтаймыз!
Республикалық кезеңде бақ сынайтын Исахан Балнұрға сәттілік серік болсын деп тілейміз!
«Төлеби-ақпарат».
