Аудандық білім бөлімі тарапынан Ұстаздар күні мерекесіне орай арнайы онкүндік іс-шаралар жоспары құрылып, онкүндік шеңберінде қала және аудан мектептерінде түрлі мазмұндағы танымдық, тәрбиелік мәні зор шаралар ұйымдастырылды. Атап айтқанда, пән бірлестіктерінің бастамасымен өткізілген бұл іс-шаралар барысында ұрпақ тәрбиесіне өлшеусіз үлес қосқан ардагер ұстаздарға құрмет көрсетіліп, олардың еңбектері ұлықталды.
Ардагерлерге концерттік бағдарламалар қойып, өнерлерін паш етті. Мектеп ұжымдары ардагерлердің еңбектегі жолын, жетістіктерін ерекше ықыласпен еске алып, кейінгі жас ұстаздарға үлгі ретінде көрсетті.
Салтанатты шара барысында аудандық білім бөлімінің басшысы Тойлыбаев Бекайдар Адамбекұлының мерекелік құттықтауы барша ұстаздарға жеткізіліп, ардагерлерге гүл шоқтары мен естелік сыйлықтар табысталды. Бұл – ұрпақтар сабақтастығын, ұстаз мәртебесінің әрдайым биік тұратынын көрсететін игі бастамалардың бірі болды.
Мерекелік кездесулер барысында ардагер ұстаздар да сөз алып, осындай құрметке ризашылықтарын білдіріп, бүгінгі буынға ізгі тілектерін арнады. Олар білім бөлімінің басшылығына, қызметкерлеріне, мектеп ұжымдарына алғыстарын айтып, ұстаз болудың қадірі мен жауапкершілігі туралы жүрекжарды лебіздерін ортаға салды.
«Төлеби-ақпарат».
