Шымкент қаласының әкімі Ғабит Сыздықбеков бокстан Әлем және Азия чемпиондарымен кездесті. Жеңіс рухы мен шабытқа толы бұл басқосу барысында спортшылар чемпионаттағы әсерлерімен бөлісіп, жетістікке жету жолындағы еңбектері жайлы әңгімеледі. Өз кезегінде қала басшысы олардың жеңістері тек Шымкенттің ғана емес, бүкіл Қазақстанның абыройын асқақтатқанын ерекше атап өтті.
Естеріңізге сала кетейік, 2025 жылдың 4–14 қыркүйегі аралығында Ливерпуль қаласында өткен бокстан Әлем чемпионатында Қазақстан құрамасы бұрын-соңды болмаған тарихи жетістікке қол жеткізді – 7 алтын, 1 күміс және 2 қола медаль еншілеп, ел мерейін үстем етті. Бұл – қазақстандық бокстың жаңа белесі.
Осы дүбірлі додада ерекше көзге түскен – ағайынды Сабырхандар. Махмұд Сабырхан (55 кг) әлем чемпионы атағын екінші рет иеленсе, оның інісі, небәрі 19 жастағы Төрехан Сабырхан (70 кг) тұңғыш рет халықаралық аренада топ жарып, чемпион атанды. Бұл – ерік-жігердің, табандылық пен тынымсыз еңбектің нәтижесі.
Ағайынды чемиондардың ерлігін ескерген Шымкент қаласының әкімдігі мен демеушілер қос чемпионға да пәтер мен су жаңа Toyota Camry 80 маркалы автокөлік сыйлады. Сондай-ақ олардың жеке жаттықтырушысы Ілияс Оралбековке де баспана сыйға тартылды. Әлемдік додада әнұранымызды әуелеткен намысты ұлдардың әкесі Айдархан Сабырханұлына Changan ХМ автокөлігі, анасы Меңтайға 100 мың доллар тарту етілді.
Бұл марапаттар – спортшылардың маңдай терімен келген жеңістеріне деген шынайы алғыс пен жоғары құрметтің айғағы. Мұндай қолдау – спортқа жаңа келген жастар үшін өте маңызды мотивация. Олар жеңіске жеткен чемпиондарға қарап, биікке талпынады, еңбектің еш кетпейтініне сеніммен қарайды. Бұндай қошемет жаттықтырушы үшін де, спортшы үшін де үлкен шабыт сыйлайтыны сөзсіз.
«Төлеби-ақпарат».
