Биылғы жылдың маусым айында Қаратөбе ауылдық округіне қарасты Қостөбе ауылының жолына асфальт төселе бастады. Ауыл биі Уәли Жұмабеков Түркістан облысының әкімі Нұралхан Көшеровтің қабылдауында болып, ауыл жолының әбден тозығы жеткенін айтып, мәселе көтерген болатын. Облыс басшысы Қостөбе ауылының жолына жөндеу жұмыстарын жүргізуге қаржы бөлінгенін, таяу уақытта асфальт төселетінін айтқан еді.
Өзге елдімекендермен салыстырғанда, біздің Қостөбе ауылының тұрғындар саны аздау болғанымен, жергілікті халық талай жылдан бері жол жөндеу мәселесін көтергенімен, билік өкілдері сөзбұйдаға салып, бұл шаруа әр жылы кешеуілдей берген болатын. Сонымен екі шақырым жол кеңейтіліп, алдымен тас төселіп нығыздалып, оның үстіне екі қайтара асфальт салынды. Жолдың ені төрт жарым метр, асфальттың қалыңдығы он сантиметрден.
Ауыл жолына асфальт төсеу кезінде оның басы-қасында аудандық мәслихат депутаты Нұрлан Ералиев, аудан әкімінің орынбасары Лесбек Серікбаев, ауылдық округ әкімі Асқынбек Балтабаев, ауыл биі Уәли Жұмабеков, блогер Гүлманат Байзақова болып, құрылыс жұмысының сапасын қадағалады.
Қостөбеліктер жолының жөнделгеніне дән риза.
М.ЖОЛАЙҰЛЫ,
зейнеткер.
