Жуырда Болгария астанасы София қаласында кадеттер арасында өткен дзюдодан Әлем чемпионатында Төлеби ауданы Жаңаұйым ауылының тумасы Ернұр Батырғали 60 келі салмақ дәрежесінде қарсыластарын айқын басымдықпен жеңіп, алтын медаль иеленді. Ернұр Батырғали – өңір тарихында дзюдо спортынан әлем чемпионы атанған алғашқы спортшы.
Ел абыройын асқақтатқан чемпионды туған жері ерекше құрметпен қарсы алды. Аудан әкімі Еркеғали Әлімқұлов бастаған көпшілік Ернұрды қошеметпен күтіп алып, салтанатты қабылдау ұйымдастырды.
– Бұл жеңіс – Сіздің табандылығыңыздың, маңдай теріңіз бен тынымсыз еңбегіңіздің жемісі. Ол – жеке жетістігіңіз ғана емес, барша еліміздің, өңіріміздің ортақ мақтанышы. Сіз елдің абыройын асқақтатып, жас ұрпаққа үлгі болып жүрген нағыз ер тұлғасыз. Алдағы спорттық жолыңызда жаңа белестерді бағындырып, көк туымызды халықаралық ареналарда желбірете беріңіз! – деді аудан басшысы өз құттықтауында.
Ұлықтау салтанатында Ернұр мен оның бапкерлеріне аудан әкімдігі, аудандық мәслихат және облыстық дзюдо федерациясы атынан Алғыс хаттар мен бағалы сыйлықтар табысталды. Сонымен қатар ауыл азаматтары чемпион мен жаттықтырушыларына тұлпар мінгізіп, баталарын берді. Жиын барысында ауызы дуалы батагөй қарияларға да құрмет көрсетіліп, шапан жабылды.
Айта кетейік, Ернұр – аудандық №3 балалар мен жасөспірімдер спорт мектебінің түлегі. Бекзат Саттарханов атындағы Түркістан облыстық олимпиада резервінің мамандандырылған мектеп-интернат-колледжінің шәкірті. Алғаш дзюдо күресінің қыр-сырын меңгертіп спортқа баулыған ұстазы – халықаралық дәрежедегі спорт шебері, самбодан Әлем чемпионы Нәбиев Мәди мен бапкерлер Абу Мақсат, Құрмантай Дулаттың да еңбегі бар. «Күрес түрлері бойынша олимпиадалық даярлау орталығы» РМҚК Жақсылық Үшкемпіров атындағы жекпе-жек сарайында жаттықтыратын бапкері – Мейірлан Баймаханбетов.
Ернұр – қазіргі уақытта Түркістан қаласындағы Қожа Ахмет Ясауи атындағы Халықаралық қазақ-түрік университеті спорт және өнер факультетінің І курс студенті.
Бұл тарихи жетістік – тек Төлеби ауданы емес, тұтас Қазақ елі үшін зор мәртебе.
«Төлеби-ақпарат».
