Бірінші Мамыр ауылындағы балалар үйі сонау кеңестік дәуірдің отызыншы жылдарындағы «Балапан басымен, тұрымтай тұсымен» кеткен ашаршылық жылдары ашылып, сол уақыттан бері ата-анасынан айырылып жетім қалған балаларға пана, қамқор болып келеді. Дегенмен, сол қиын-қыстау жылдармен бүгінгі заманды салыстыруға келмейді. Біздің айтпағымыз, бұл балалар үйінің бір ғасырға жуық тарихы барын еске салу ғана.
Кезінде осы балалар үйінде тәрбиеленіп, есімі елге белгілі болған атпал азаматтар, олардың ұрпақтары балалар үйіне келіп, кездесулер өткізіп, қамқорлық танытып жүргендерін есітіп, куә болып та жүрміз.
Жаңа оқу жылы есік қағып тұрғанда Ленгір қалалық ауруханасының бас дәрігері Елдос Сұлтанов бастаған бірнеше ақ желеңді абзал жандар осы балалар үйінің бүлдіршіндерін қуантып қайту үшін арнайы келіп, еліміздегі «Мектепке жол» акциясына өз үлестерін қосты.
Қонақтарды осы балалар мекемесі директорының тәрбие ісі жөніндегі орынбасары Сәкен Шатырбеков жылы жүзбен қарсы алып, балалардың жатын бөлмелерін аралатып көрсетіп, тұрмыстық жағдайларымен таныстырды.
– Түркістан облыстық білім басқармасына қарасты бұл балалар үйі 10 жылдан, бері «Төлеби отбасылық үлгідегі балалар ауылы» КММ-сі деп аталады. Бүгінде ата-анасының қамқорлығынан айырылған және жетім қалған, жалпы барлығы 69 бала тәрбиеленуде. Әр ұяда 7-10 баладан бар. Сол әр ұяға екі тәрбиешіден бөлінген. Олар балаларға отбасы жағдайындағыдай қамқор болып, тәрбие береді. Балалар тәрбиешілеріне ұстаз деп емес, ана деген жылы көзқараспен қарайды. Бір ұяның тәрбиешілері тамақтарына дейін балалармен бірге қауымдасып дайындайды, үй тірлігіне баулиды. Тәрбиеленушілеріміз жазғы демалыста үш ай бойы «Төлеби нұры» балалар демалыс лагерінде тынығып, күні кеше ғана оралды.
Биыл жалпы орта мектепті бітірген бірнеше түлегіміз мемлекеттік грант иегері атанып, жоғары оқу орнының студенті атанды, – дейді С.Шатырбеков.
Бас дәрігер Е.Сұлтанов және онымен бірге барған медицина қызметкерлері бастауыш сыныпта оқитын қамкөңіл балаларға оқушы сөмкесі мен оқу құралдарын, ал балабақшаға барып жүрген бүлдіршіндерге түрлі ойыншықтар тарту етіп, қуанышқа бөледі, ескерткішке суретке түсті.
Отбасылық үлгідегі балалар үйінің тәрбиешілері балаларға қуаныш сыйлаған жаны жомарт, мейірімді, денсаулық күзетінде сапта тұрған жандарға алғыс айтып, ризалықтарын білдірді.
С.ОРЫНБАСАР.
Бірінші Мамыр ауылдық округі.
