Дулат тайпасының төрт атасының бірі, атақты биі, кемеңгер шешені, ерекше тұлға болған, VIII ғасырда өмір сүрген, соңынан өскен-өнген рулық ұрпақ өрбіген Жаныс баба рухына және барша дәметкен әруақтарға арнап «Жаныс баба» республикалық қоғамдық қорының ұйымдастыруымен Сайрам ауданының Қарамұрт елді мекеніндегі Жаныс баба кесенесінде Жанту – Жайылмыс – Өтебай бабадан тарайтын Қуандық атаның ұрпақтары Бәйдібек биден өрбитін Сарыүйсін, Шапырашты, Ошақты, Ысты, Албан, Суан, Дулат – Сиқым, Жаныс, Ботпай, Шымыр бабалар ұрпақтары қарияларының төрағаларынан құрылған «Бәйдібек қаған» қоғамдық қорының құрылтайшыларын, «Қаз дауысты Қазыбек би», «Сейітқұл әулие», «Әйтеке би» қоғамдық қорларының төрағаларын, ел ақсақалдары мен азаматтарын, ағайындарды жылына үш рет өткізілетін дәстүрлі бас қосуға шақырып, «Алланың ризалығы үшін» асын өткізді.
Ас алдында есімі елге белгілі азаматтар ұлт, ұрпақ тәрбиесі, салтымызды, дәстүрімізді, әдет-ғұрпымызды сақтау, жандандыру, ағайындар сыйластығы, қазақтың ынтымағы мен бірлігін нығайту жөнінде келелі әңгімелер қозғады.
Жамбыл облысының аудандарынан, Тараз, Алматы қалаларынан, Өзбекстан Республикасынан келген ағайындар астың, құранның ішінде болды. Келесі кіші асты Жамбыл облысының Байзақ ауданындағы бауырлар өткізетіндігі белгіленіп, бата жасалды. Ас жоғары деңгейде, ұйымшылдықпен өтті.
Осы жиынды өткізуге белсене ат салысқан Өтебай бабаның ұлы Қуандық атадан тарайтын азаматтарға, оларға бас болып жүрген Данияр Айтбаевқа көпшілік қауым ризалығын білдірді.
«Төлеби-ақпарат».
