Үстіміздегі жылы ұлы ақын әрі ойшыл, қазақтың дана перзенті Абай Құнанбайұлының туғанына 180 жыл толуын бүкіл елімізде, қала берді шетелдерде түрлі мерекелік шаралар ұйымдастырып атап өтуде. Сахнада Абай әндері шырқалып, драмалық қойылымдар көрермен назарына ұсынылуда, телеараларда көркем фильмдер көрсетілуде. Өз халқына, бүкіл адаматқа ортаймас рухани құндылықтар қалдырған ұлы тұлғаға қандай құрмет көрсетсек те жарасады.
Ленгір қаласындағы Абай аллеясында ұлы ақын, ағартушы және ойшыл Абай Құнанбайұлының туғанына 180 жыл толуына орай мерекелік шара ұйымдастырылды.
Көпшілік бас қосқан салтанатты басқосуда аудандық мәслихаттың төрағасы Нұрлан Қойбағаров пен аудандық ардагерлер кеңесінің төрағасы Әтірхан Шыңғысбаев сөз сөйлеп ұлы Абайдың өмір жолы ұрпақтарға үлгі-өнеге болып, рухани қазынасы халыққа мәңгілікке азық болатындығын айтты.
Мерекелік шарада бас қосқан аудан тұрғындары, жастар, мәдениет қызметкерлері мен қонақтар ұлы тұлғаның асыл мұрасын құрметтеп, ескерткішке гүл шоқтарын қойды.
Салтанатты жиында ауданның түкпір-түкпірінен келген талантты жастар Абайдың өлеңдерін оқып, әндерін шырқап, көпшіліктің ыстық ықыласына бөленді. Өз өнерімен дараланған өнерпаздарға арнайы дипломдар мен бағалы сыйлықтар тапсырылды.
Абай Құнанбайұлының туғанына 180 жыл толуына орай мұндай мерекелік шаралар аудан аумағында алдағы уақытта да жалғасын таба бермек.
«Төлеби-ақпарат».
