Түркістан облысының әкімі Нұралхан Көшеров жұмыс сапарымен Төлеби ауданына келіп, бірқатар әлеуметтік және өндірістік нысандардың жұмысымен танысты. Сапар барысында аудан активімен кездесіп, өңірдің әлеуметтік-экономикалық дамуына қатысты мәселелерді талқылады.
Жиын барысында облыс әкімі 2025 жылдың алғашқы алты айында аудан бойынша негізгі капиталға 20,3 млрд теңге инвестиция тартылғанымен, кейбір ауылдық округ әкімдері межеленген жоспарларды толық орындамағанын атап өтті. Осыған байланысты жауапты әкімдер мен сала жетекшілеріне жұмысты жандандыруды тапсырды.
– Ленгір қаласы қажетті инфрақұрылыммен толық қамтылған. Алайда соңғы жылдары қалада жаңа инвестициялық жобалар іске аспаған. Инвестиция тарту, жаңа өндіріс орындарын ашу бағытындағы жұмыстарды ширату қажет, – деді облыс әкімі.
Облыс басшысы сонымен қатар, Мемлекет басшысының бастамасымен жүзеге асып жатқан «Таза Қазақстан» экологиялық акциясының маңыздылығына тоқталып, бұл бастама уақытша науқан емес, жыл бойы жалғасатын тұрақты жұмыс екенін еске салды. Қоршаған ортаны таза ұстау – әр азаматтың күнделікті дағдысына айналуы тиіс екенін атап өтті.
Сөз соңында Нұралхан Көшеров ауданның өзіндік кіріс көлемін арттыру, ауыл шаруашылығын, кәсіпкерлікті және туризм саласын дамыту бағытында нақты тапсырмалар берді.
Аудан әкімдігінде өткен мәжілісте аудан әкімі Еркеғали Әлімқұлов бірінші жартыжылдықтың қорытындысын баяндап, салалар бойынша атқарылған жұмыстарға тоқталды. Сонымен қатар, басқарма басшылары өз бағыттары бойынша жоспарлар мен орын алған кемшіліктерді атап өтіп, нақты міндеттер жүктелді.
2025 жылдың алғашқы 6 айында ауданның жалпы өңірлік өнім көлемі 70,8 млрд теңгені құрап, өткен жылмен салыстырғанда 39%-ға артты. Өңірлік өнім құрылымында өнеркәсіп саласының үлесі – 53,3%, ауыл шаруашылығы – 20,4%, сауда – 18,4% және құрылыс саласы – 7,9% болды.
Жан басына шаққандағы ішкі өнім көлемі 480 мың теңгеге жетіп, бұл көрсеткіш те 39%-ға өсім көрсетіп отыр. Өнеркәсіп өнімінің жалпы көлемі 37,7 млрд теңгені құрап, нақты көлем индексі 107,9%-ды көрсетті. Оның ішінде өңдеу өнеркәсібінің үлесі 34 млрд теңге болса, бұл өткен жылмен салыстырғанда 10,7%-ға артық.
Аудан экономикасын әртараптандыру және жаңа жұмыс орындарын ашу мақсатында жалпы құны 6,5 млрд теңгені құрайтын 4 ірі инвестициялық жобаны жүзеге асыру жоспарлануда. Бұл жобалар нәтижесінде 180 жаңа жұмыс орны ашылады.
«Төлеби-ақпарат».
