Ақпараттық-танымдық форум

Дүйсенбі күні Мемлекет басшысының «Заң және тәртіп» қағидасын насихаттау мақсатында «ХХІ ғасырдың қаржылық триггерлері» атты ақпараттық-танымдық форум ұйымдастырылды. Ауқымды шара аудан әкімдігі мен мобильді ақпараттық-насихат тобының бастамасымен өтті.

Форумның басты мақсаты – тұрғындардың қаржылық сауаттылығын арттыру, қаржылық алаяқтықтың алдын алу, пирамидаларға қарсы қоғамдық иммунитет қалыптастыру және азаматтардың құқықтық қауіпсіздігін нығайту.

Форум жұмысына мемлекеттік мекеме қызметкерлері, құқық қорғау органдарының өкілдері, колледж ұжымдары, ардагерлер мен жастар қатысты. Шараны аудан әкімі аппаратының басшысы Амалбек Өміртай ашып, қоғамда белең алып жатқан алаяқтық әрекеттер мен олардың салдарына тоқталып, бұл бағытта жүргізіліп жатқан жұмыстар жайлы баяндады.

№9 колледж директорының тәрбие ісі жөніндегі орынбасары өз баяндамасында интернет алаяқтық, қаржы пирамидалары, жеке деректердің қауіпсіздігі және қаржылық мәдениеттің маңызы туралы нақты деректер келтіріп, тыңдаушыларға құнды кеңестер ұсынды.

Форум соңында көшпелі қоғамдық қабылдау ұйымдастырылып, қатысушылар мамандарға сауалдарын қойып, пікір алмасуға мүмкіндік алды.

«Төлеби-ақпарат».