Аудандық әкімдіктің кіші мәжіліс залында ветеринария саласы қызметкерлерінің кәсіби мерекесіне арналған салтанатты жиын өтті.
Іс-шарада аудан әкімі аппаратының басшысы Амалбек Өміртай сөз алып, сала мамандарын мерекелерімен құттықтады. Ол ветеринар мамандардың қоғамдағы айрықша рөлін атап өтіп, олардың тек жануарларды емдеумен ғана шектелмей, биотехнология, азық-түлік қауіпсіздігі, зооноздық аурулардың алдын алу, экологияны қорғау секілді бағыттарда да маңызды қызмет атқаратынын айтты.
– Сіздердің тынымсыз еңбектеріңіздің арқасында мал шаруашылығы өркендеп, тұрғындар сапалы әрі қауіпсіз өніммен қамтамасыз етілуде. Табиғат пен жануарлар әлеміне жанашырлық пен жауапкершілікті талап ететін бұл сала – еліміздің агроөнеркәсіптік кешенінің ажырамас бөлігі. Ел игілігіне қызмет ете беріңіздер! – деді Амалбек Дәркенұлы.
Салтанатты жиын соңында бірқатар ветеринар мамандар қажырлы еңбегі еленіп, аудан әкімінің Алғыс хатымен марапатталды.
«Төлеби-ақпарат».
