Ел дамуы өңірлер өркендеуінен басталады

Мемлекет басшысы Қасым-Жомарт Тоқаевтың 2026 жылғы 28 қазанда жариялаған «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауы еліміздің алдағы даму бағдарларын айқындап, жаңа тарихи кезеңдегі маңызды міндеттерді белгілеп берді. Президент өз сөзінде экономикалық қуатты арттыру, инфрақұрылымды жаңғырту, технологиялық өркендеу және халықтың әл-ауқатын жақсарту мәселелеріне ерекше тоқталды.
Жолдаудағы «Біздің басты мақсатымыз – Әділетті, Күшті, Таза, Озық Қазақстанды құру» деген тұжырым еліміздің даму бағытындағы негізгі басымдықтарды айқындайды. Бұл міндеттерді жүзеге асыру тек орталықтағы мемлекеттік органдардың ғана емес, әрбір өңір мен елді мекеннің, жергілікті атқарушы органдардың да жүйелі жұмысын талап етеді.
Президент көтерген маңызды бастамалардың бірі – инфрақұрылымды кешенді жаңғырту. Мемлекет басшысы алдағы кезеңде әлеуметтік нысандарды, жолдарды, инженерлік желілерді, тұрғын үй-коммуналдық шаруашылық нысандарын салу мен жаңартуға басымдық берілетінін атап өтті. Бұл бастамалардың түпкі мақсаты – тұрғындарға қолайлы өмір сүру ортасын қалыптастыру.
Осы орайда қалаларды дамыту, олардың инженерлік және әлеуметтік инфрақұрылымын жетілдіру жұмыстарының маңызы зор. Ленгір қаласы да уақыт талабына сай жаңарып, тұрғындардың сұранысына сәйкес дамуы тиіс. Қаладағы жолдардың сапасы, ауызсу, электр қуаты, абаттандыру, көгалдандыру, қоғамдық кеңістіктерді ретке келтіру – күн тәртібінен түспейтін өзекті мәселелер. Сондықтан әрбір жобаны жоспарлау кезінде халықтың нақты қажеттілігі мен оның нәтижесіне басымдық берілуі қажет.
Жолдауда экономиканы әртараптандыру, шағын және орта бизнесті қолдау, инвестиция тарту мәселелеріне де айрықша мән берілді. Президент мемлекеттік қаражат жеке инвестицияны алмастырмай, керісінше, оны тартуға ықпал етуі керектігін атап көрсетті. Бұл – жергілікті жерлерде кәсіпкерлікті дамытуға, жаңа өндіріс орындарын ашуға және тұрақты жұмыс орындарын көбейтуге бағытталған маңызды ұстаным.
Қала экономикасының дамуы да кәсіпкерлік белсенділікпен, инвестициялық мүмкіндіктерді тиімді пайдаланумен тығыз байланысты. Осы бағытта жергілікті кәсіпкерлерге қолайлы жағдай жасау, жаңа бастамаларды қолдау және жұмыспен қамту мәселелеріне жүйелі назар аудару қажет.
Мемлекет басшысы білім мен ғылымның, инновация мен жасанды интеллектінің ел болашағындағы рөліне де тоқталды. «Қазіргі заманның басты қуаты – білім мен ғылымда, озық инновацияларда» деген Президент сөзі жаңа дәуірдің басты талабын айқын көрсетеді. Демек, жас ұрпақтың сапалы білім алуына жағдай жасау, заманауи технологияларды меңгеруіне мүмкіндік беру – ортақ міндетіміз.
Сонымен қатар Жолдауда «Адал азамат» қағидатын орнықтыру, заңға құрметпен қарау, қоғамдық тәртіпті сақтау және ел игілігі үшін адал еңбек ету мәселелері қозғалды. Бұл ұстанымдар қаланың тазалығы мен қоғамдық мәдениетін қалыптастыруда да маңызды. Таза әрі көрікті қала құру тек коммуналдық қызметтердің жұмысына ғана емес, әрбір тұрғынның жауапкершілігіне байланысты.
Меніңше, Жолдауда белгіленген міндеттердің басты өлшемі – олардың халықтың күнделікті өмірінен көрініс табуы. Әрбір атқарылған жұмыстың нәтижесі тұрғындардың тұрмыс сапасын жақсартуға, қаланың дамуына және келешек ұрпаққа қолайлы орта қалыптастыруға бағытталуы тиіс.
Президент атап өткендей, «Отаншыл болу – заңды құрметтеу, тәртіпке бағыну, ел игілігі үшін табанды еңбек ету деген сөз». Бұл – мемлекеттік қызметшілерге де, кәсіпкерлерге де, әрбір азаматқа да ортақ жауапкершілік.
Жаңа тарихи кезеңдегі міндеттерді жүзеге асыруда бірлік, жауапкершілік және нәтижелі еңбек айрықша маңызға ие. Сондықтан Ленгір қаласының дамуына қатысты жұмыстарда Жолдауда белгіленген басымдықтарды басшылыққа алып, қаланың инфрақұрылымын жетілдіру, тұрғындарға қолайлы жағдай жасау және елді мекеннің әлеуетін арттыру бағытындағы міндеттер басты назарда болады.

Мақсат ЖҰМАБАЕВ,
Ленгір қаласының әкімі