Ата-аналармен ақылдасу сағаты

Төлеби аудандық білім бөлімінің ұйымдастыруымен Әл-Фараби атындағы жалпы білім беретін мектепте аймақтық «Ата-аналармен ақылдасу сағаты» өтті. Ашық форматта ұйымдастырылған кездесуге Жаңажол, Ынтымақ, С. Темірбеков, Ы. Алтынсарин, Тағайна және Бірінші Мамыр мектептерінің ата-аналары қатысты.
Жүздесу барысында аудандық білім бөлімінің басшысы Шұға Нұрабаева ата-аналармен еркін пікір алмасып, бала тәрбиесіндегі өзекті мәселелерді ортаға салды. Ол отбасы мен мектеп арасындағы байланысты нығайту, жас ұрпақтың тәрбиесіне бірлесе көңіл бөлу қажеттігін атап өтті. Сонымен қатар ата-аналардың ұсыныс-пікірлерін тыңдап, көтерілген мәселелер бойынша ой бөлісті.
Кездесуде полиция бөлімінің маманы Сұлтан Бердалин кәмелетке толмағандар арасында кездесетін құқықбұзушылықтар мен келеңсіз жағдайларға тоқталды. Жасөспірімдер қауіпсіздігін қамтамасыз ету, құқықбұзушылықтың алдын алу және ата-аналардың бала алдындағы жауапкершілігі жөнінде түсіндіру жұмыстарын жүргізді.
Ал аудандық білім бөлімінің әдіскерлері Мейраш Аяшова мен Асель Дарганова білім беру ұйымдарында тәрбие бағыты бойынша атқарылып жатқан жұмыстар мен енгізілген өзгерістер туралы баяндады. Олар тәрбие үдерісінде ата-аналармен тығыз байланыс орнатудың, ортақ мақсат жолында бірлесе әрекет етудің маңыздылығына назар аударды.
Басқосуда ата-аналар өздерін толғандырған мәселелерді ортаға салып, мамандармен пікір алмасты. Мұндай кездесулердің негізгі мақсаты – мектеп пен отбасы арасындағы өзара сенімді нығайту, бала тәрбиесіндегі ортақ жауапкершілікті арттыру және жасөспірімдердің қауіпсіз ортада саналы азамат болып қалыптасуына ықпал ету.
Расында да, бала тәрбиесі тек отбасының немесе мектептің ғана міндеті емес, бұл – тұтас қоғамға ортақ жауапкершілік. Сондықтан осындай ашық пікір алмасу алаңдары өзекті мәселелерді бірлесе шешуге және ұрпақ тәрбиесіндегі сабақтастықты қалыптастыруға мүмкіндік береді.

«Төлеби-ақпарат».