«Өмір жолы — өнеге, еңбегі — елге мұра»

Керегетас шағын жинақты жалпы білім беретін мектебінде «Өмір жолы — өнеге, еңбегі — елге мұра» тақырыбында тағылымды дөңгелек үстел өтті.
Іс-шараға 8–9-сынып оқушылары мен мектеп ұстаздары қатысып, ұзақ жылдар білім беру саласында еңбек еткен зейнеткер ұстаз, кітапханашы Исмаилова Ақжарқын Әлімбекқызы арнайы шақырылды.
Кездесу барысында ардагер ұстаздың еңбек жолы, ұстаздық қызметі, кітапханашы болған жылдары мен шәкірттерге қалдырған өнегесі туралы сыр шертілді. Қонақтың өмір жолына арналған слайдтар көрсетіліп, бейнеролик ұсынылды. Оқушылар үлкен қызығушылықпен тамашалап, өз сұрақтарын қойып, пікір алмасты.
Шараның тәрбиелік мәнін арттыру мақсатында мектептің әлеуметтік педагогы арнайы тренинг өткізіп, ұстаздық еңбектің қадірі, үлкенді сыйлау, ізеттілік пен адамгершілік құндылықтары жөнінде оқушылармен қызықты жұмыстар жүргізді.

ҰСТАЗҒА ҚҰРМЕТ – ҰРПАҚҚА ӨНЕГЕ

«Біртұтас тәрбие» бағдарламасы аясында, мектептің тәрбие жоспарына сәйкес Ұстаздар күніне орай «Ұстазға құрмет – ұрпаққа өнеге» тақырыбында тағылымды әрі мазмұнды мерекелік іс-шара кең көлемде ұйымдастырылды.

Ұстаз – білімнің шамшырағы, ұрпаққа бағыт-бағдар беріп, жүрекке ізгіліктің дәнін себетін аяулы маман. Ұстаз еңбегіне құрмет көрсету – оның маңдай терін бағалау, еңбегін елеп, мәртебесін биіктету – әр буынның парызы.
Мерекелік шараны мектеп ұйымдастырушысы Н.Абдраимова мен мектеп президенті, өзін-өзі басқару ұйымының белсенді мүшелері бірлесе ұйымдастырып, ұстаздарға деген ыстық ықыластарын ерекше форматта жеткізді. Оқушылардың жүрекжарды құттықтаулары, мерекелік әндері мен ізгі тілектері ұстаздарға көтеріңкі көңіл-күй сыйлады.
Шара барысында ұстаз еңбегін дәріптейтін бейнеролик көрсетіліп, мектеп өміріндегі ұстаз бен шәкірт арасындағы сабақтастық, сыйластық пен өнегелі қарым-қатынас кеңінен насихатталды.
Мерекелік басқосуға ата-аналар да белсене қатысып, ұстаздарға жүрекжарды алғыстары мен ақжолтай тілектерін білдірді. Сонымен қатар, 1993 жылы мектеп бітірген түлектер ұстаздарға құрмет көрсетіп, демеушілік танытып, мерекелік шараның жоғары деңгейде өтуіне өз үлестерін қосты. Бұл – мектеп пен түлек арасындағы алтын арқаудың, ұстазға деген шынайы ризашылықтың жарқын көрінісі.
Шара соңында ұстаздарға марапаттар, сый-сияпаттар мен естелік тартулар табысталып, еңбегі еленген ұлағатты жандарға ерекше құрмет көрсетілді. Әрбір ұстазға айтылған жылы лебіз бен ізгі тілек мерекенің маңызын арттыра түсті.
Ұстазға тағзым – білімге тағзым.
Ұстазды құрметтеу – ұрпақты құрметтеу.
Ұстаз еңбегін бағалау – ел болашағына жасалған тағылымды қадам!
Барша ұстаздарға «Еңбектеріңіз жемісті, абыройларыңыз асқақ болып, шәкірттеріңіз биіктен көріне берсін!» деген ізгі тілегімді білдіремін.

Н.АБДРАИМОВА,
Керегетас шағын жинақты жалпы білім беретін мектебінің педагог ұйымдастырушысы.

Суреті бар