Заманауи оқыту әдістері талқыланды

Ленгірдегі №2 Ш.Уәлиханов атындағы жалпы білім беретін мектепте «Есептен шешімге: химия және биологиядағы есеп шығару дағдылары» тақырыбында аймақтық оқыту семинары өтті. Іс-шараға қала мектептері мен келешек мектептердің химия және биология пәндері мұғалімдері қатысты.
Семинардың негізгі мақсаты педагогтердің кәсіби құзыреттілігін арттыру, оқушылардың есеп шығару қабілетін жетілдіру, логикалық ойлауын дамыту және зерттеушілік дағдыларын қалыптастыру болды. Сонымен қатар пәндерді оқытуда заманауи технологиялар мен тиімді әдіс-тәсілдерді қолдану жолдарына назар аударылды.
Іс-шара барысында мұғалімдер ашық сабақтар өткізіп, зертханалық-практикалық жұмыстарды ұйымдастыру тәжірибелерімен бөлісті. Сондай-ақ STEM технологияларын, PASCO цифрлық датчиктерін қолдану мүмкіндіктері таныстырылып, танымдық және зияткерлік квесттер арқылы оқушылардың пәнге қызығушылығын арттыру мәселелері қарастырылды.
Семинар педагогтерге өзара тәжірибе алмасып, білім беру үдерісіндегі жаңашыл әдістерді талқылауға мүмкіндік берді. Әсіресе теориялық білімді тәжірибемен ұштастыру, күрделі есептерді шешу жолдарын меңгерту және оқушылардың өздігінен іздену қабілетін дамыту мәселелері маңызды бағыттардың бірі болды.
Ұйымдастырушылардың мәліметінше, мұндай оқыту семинарларын алдағы уақытта әр аймақтағы бірнеше мектепте өткізу жоспарланып отыр. Бұл бастама педагогтердің кәсіби байланысын нығайтып, озық тәжірибелерді таратуға және білім беру сапасын арттыруға ықпал етпек.
Тәжірибе алмасу – кәсіби дамудың маңызды тетігі. Ал сапалы білім беру – ұстаздардың үздіксіз ізденісі мен ортақ еңбегінің нәтижесі.