Мемлекеттік тіл – ел бірлігінің тірегі

Қазақстан Республикасы Тілдер мерекесіне орай Төлеби ауданындағы білім беру ұйымдарында «Мемлекеттік тіл – ұлттық құндылық пен қоғамдық бірліктің негізі» атты онкүндік өтуде.

Тіл – ұлттың рухани қазынасы, мәдениеті мен тарихын ұрпақтан-ұрпаққа жеткізетін баға жетпес құндылық. Ана тілі арқылы халықтың дүниетанымы, салт-дәстүрі мен ұлттық болмысы қалыптасады. Сондықтан мемлекеттік тілдің қолданыс аясын кеңейту, оның қоғамдағы мәртебесін арттыру – ел болашағы үшін атқарылатын маңызды міндеттердің бірі.

Қазақстан – түрлі этнос өкілдері татулық пен өзара түсіністік жағдайында өмір сүріп жатқан көпұлтты мемлекет. Осындай қоғамдық келісім мен тұрақтылықты қалыптастыруда тіл мәдениетінің орны ерекше. Мемлекеттік тілді құрметтеу – елді, оның тарихы мен құндылықтарын қадірлеудің бір көрінісі болса, еліміздегі барлық тілдерге құрметпен қарау – өзара сыйластық пен бірліктің негізі.

Онкүндіктің басты мақсаты – мемлекеттік тілдің мәртебесін көтерумен қатар, білім алушылардың тілге деген қызығушылығын арттыру, тілдік құзыреттілігін дамыту, ұлттық мәдениет пен рухани құндылықтарды дәріптеу. Сонымен бірге әртүрлі тілдер мен мәдениеттерге құрметпен қарау арқылы жас ұрпақтың бойына қоғамдық келісім мен азаматтық жауапкершілік қасиеттерін сіңіру көзделеді.

Осы бағытта ауданның білім беру ұйымдарында мәдени-танымдық, шығармашылық және тәрбиелік іс-шаралар ұйымдастырылуда. Оқушылардың мемлекеттік тілге деген қызығушылығын арттыруға бағытталған түрлі байқаулар, кездесулер, танымдық сағаттар мен шығармашылық жұмыстар өткізіліп, тілдің адам өмірі мен қоғамдағы маңызы кеңінен насихатталуда.

Мемлекеттік тіл – барша қазақстандықтарды біріктіретін ортақ құндылық. Оны дамыту мен дәріптеу – тек тіл мамандарының немесе білім саласы қызметкерлерінің ғана емес, бүкіл қоғамның ортақ міндеті. Ал тілге құрмет пен өзара түсіністік орныққан орта – қоғамдық бірлік пен ел тұрақтылығының берік негізі.

«Төлеби-ақпарат».