Төлеби ауданында Қазақстан мұсылмандары діни басқармасының «Мектепке жол» акциясы аясында «Жаңа оқу жылына – жаңа жабдықтар» атты қайырымдылық шарасы өтті. Игі бастама әлеуметтік қолдауды қажет ететін отбасылардың балаларына көмек көрсетіп, жаңа оқу жылын алаңсыз бастауына жағдай жасауға бағытталды.
Аудан орталығындағы «Нұр» мешітінде ұйымдастырылған шараға «Ешенқұлұлы Қуаныш» жеке қорының өкілдері мен еркін күрестен әлем чемпионы Ағабек Бағдаулет Әлімжанұлы арнайы қатысты. Қайырымдылық шарасы ата-баба рухына Құран бағыштаудан бастау алды.
Шара барысында ауданның бас имамы Үсен Саурбаев игі іске демеушілік танытып, көпшілікке қолдау көрсеткен «Ешенқұлұлы Қуаныш» жеке қорының басшылығына алғысын білдірді. Ол қайырымдылықтың қоғамдағы өзара көмек пен жанашырлықты нығайтудағы маңызына тоқталды.
Игі шараның басты мақсаты – әлеуметтік жағдайы төмен және жалғызбасты отбасылардың балаларын жаңа оқу жылына қажетті құралдармен қамтамасыз ету. Осы мақсатта орталық «Нұр» мешіті мен ауылдық мешіттерге тіркелген 200 отбасының баласына мектепке қажетті оқу құралдары салынған жаңа мектеп сөмкелері табысталды. Оның ішінде 100 ұл бала мен 100 қыз бала қамтылды.
Балаларға жасалған мұндай қолдау – олардың білім алуға деген ынтасын арттырып қана қоймай, ата-аналарға да үлкен демеу. Қайырымдылық – қоғамдағы адамгершілік пен мейірімділіктің көрінісі. Осындай игі бастамалардың жүзеге асуы ел азаматтарының әлеуметтік жауапкершілігі мен жанашырлығының артып келе жатқанын аңғартады.
«Мектепке жол» акциясы аясындағы «Жаңа оқу жылына – жаңа жабдықтар» шарасы да көпке үлгі боларлық ізгі істің бірі болды. Баланың болашағына жасалған әрбір қолдау – елдің ертеңіне жасалған инвестиция.
«Төлеби-ақпарат».
http://tolebituy.kz/wp-content/uploads/2026/06/Төлеби-туы-2026.06АТО.pdf
