Екпінді ауылында Қазақстан халқы Ассамблеясының 30 жылдығына орай дүбірлі көкпар ойыны өтті.
Ұлттық спорт додасына Шардара ауданының тумасы, ұлттық спорттың жанашыры, жеке кәсіпкер Виктор Деревянко ұйытқы болып, демеушілік етті. Жарыстың жалпы жүлде қоры 4,5 млн теңгені құрады.
Түркістан облыстық қоғамдық даму басқармасы «Қоғамдық келісім» КММ-нің қолдауымен ұйымдастырылған іс-шараға еліміздің бірқатар өңірлері мен Германия, Ресей, Қытайдан келген қонақтар, сондай-ақ облыстың барлық аудан, қалаларынан атбегілер мен шабандоздар және ардагер спортшылар, ауыл ақсақалдары, БАҚ өкілдері, жергілікті тұрғындар қатысты. Көкпардың басты ұйымдастырушысы Виктор Борисович өз сөзінде еліміздің тұтастығы мен бірлігін, татулығы мен тыныштығын өзіміздің күн сайынғы қажырлы еңбегімізбен қолдап, қорғап нығайта беру әрбір қазақстандықтың азаматтық міндеті екенін атап өтті.
Спорт сайысының қорытындысында тақымын қысып, көксеркені көтере білген үздік шабандоздар қаржылай сыйлықтармен марапатталды. Келестік Ғалымжан Мырзабаев пен қазығұрттық Бәйдібек Сабыров үздік шығып, оларға 500 мың теңгеден жүлде табыс етілді. Басқа да шабандоздарға қомақты сыйлықтар берілді.
Білектілер мен жүректілердің басын қосқан дүбірлі дода соңында аузы дуалы қариялар жастарға бата беріп, елдің азаматы болуға шақырды, сондай-ақ еліміздің ырыс-несібесі молайып, халқымыздың береке-бірлігі арта берсін деген ізгі тілектерін жеткізді.
Көкпарда ас беріліп, киіз үйлер тігіліп, патриоттық әндер шырқалды.
«Төлеби-ақпарат».
