Күн мен түн теңеліп, табиғат жаңаратын, берекенің бастауы – Ұлыстың Ұлы күні Ленгір қаласындағы орталық алаңда «Қош келдің, әз Наурыз!» атты мерекелік іс-шара өтті.
Аудан әкімі Еркеғали Әлімқұлов төлебиліктерді ұлық мейраммен құттықтап, ізгі тілегін жеткізді. Еркеғали Амантайұлы өз сөзінде Наурызнама онкүндігіне сәйкес тазарту жұмыстарынан бастап, ұлттық салт-дәстүрімізді дәріптеуге, қайырымдылық, мейірімділік пен тату көршілікті насихаттауға арналған көптеген игі шаралар ұйымдастырылып, өткізіліп жатқанын айта келе, жұртшылықты ауданның әлеуметтік-экономикалық дамуы бағытында қолға алынған жұмыстармен таныстырды.
– Ауданымызда Президентіміздің бастамалары, облыс әкімінің тапсырмалары, мемлекеттік бағдарламалар іске асырылып, әлеуметтік-экономикалық даму бағытында жүйелі жұмыстар жүргізілуде. Ауданның инвестициялық әлеуетін арттыру, өнеркәсіпті дамыту, жаңа жұмыс орындарын құру, салық түсімдерін ұлғайту мақсатында Бадам су қоймасының жанында индустриалдық аймақ құрылуда. Киелітас ауылы аумағынан өндірістік парк құру жоспарлануда… Наурыз мейрамы байтақ елімізге молшылық, қасиетті жерімізге құт-береке әкелсін! Еліміздің ырысы артып, ырыздығы молая берсін. Сіздерге зор денсаулық, бақ-береке және толайым табыс тілеймін! Әз Наурыз әр шаңыраққа шаттық пен қуаныш әкелсін! – деді өз сөзінде аудан әкімі.
Мерекелік жиын «Қош келдің, әз Наурыз!» атты композициялық қойылыммен басталып, «Наурыз-думан» әнімен жалғасын тапты. Мерекеге жиналған жұртшылық қолөнер шеберлері мен суретшілердің туындылары қойылған көрмені тамашалады. Киіз үйлер тігіліп, аналардың қатысуымен тұсаукесер, киіз басу секілді ұлттық салт-дәстүрді паш ететін қойылымдар көрсетілді. Бұл күні қазақша күрес, қол күресі, асық ату, арқан тарту, ләңгі тебу сияқты ұлттық спорт түрлерінен жарыстар ұйымдастырылды. Аудандық мәдениет үйінің өнерпаздары әннен шашу шашып, іс-шараларға қатысушыларға мерекелік көңіл-күй сыйлады.
Аудан әкімі Еркеғали Әлімқұлов пен аудандық мәслихат төрағасы Нұрлан Қойбағаров қадамын қаз басқан бүлдіршіндердің тұсауын кесіп, спорт сайыстарының жеңімпаздарын марапаттады.
«Төлеби-ақпарат».
